Türkiyənin Aksaray vilayətində havaya qalxmış iki hava şarı güclü külək səbəbindən sərt eniş edərək yerə çırpılıb.
Oxu.Az bu barədə "Anadolu" agentliyinə istinadla xəbər verir.
Aksaray valisi Mehmet Ali Kumbuzoğlunun sözlərinə görə, hava şarları Ihlara Vadisindən havaya qalxıblar və onlardan biri Gözlukuyu kəndi yaxınlarında yerə düşüb:
"Qəza nəticəsində hava şarının pilotu ölüb. 19 indoneziyalı turist isə yüngül yara alıb. Pilotun ayaqları ipə dolaşdığı üçün hava şarından yerə düşüb. O, hava şarının səbətinin altında qalaraq keçinib. Turistlər xəstəxanaya yerləşdiriliblər".
Ihlara vadisindən havaya qalxmış başqa hava şarı Güzelyurt rayonunun Belisırma kəndi yaxınlarında sərt eniş edib. Hadisə nəticəsində 12 hindistanlı turist yaralanıb. Onlar xəstəxanaya çatdırılıblar.
