Türkiyədə Nazilli Bələdiyyəsi Lütfi Selek Türk Klassik Musiqisi Xorunun təşkilatçılığı ilə Mehmet Yüzügülər Mədəniyyət Mərkəzində "Xoş gəldin, bahar" adlı konsert keçirilib.
Konsertin sonunda xor Şimali Kipr Türk Cümhuriyyətində verdiyi konsert zamanı infarkt keçirərək dünyasını dəyişən məşhur sənətçi Volkan Konakın xatirəsinə mahnı səsləndirməyə başlayıb. Bu zaman arxa cərgədə dayanan xor ifaçısı Mehmet Gündoğdu qəfil yerə yıxılıb.
Bu barədə Oxu.Az DHA-ya istinadən xəbər verir.
Məlumata görə, eyni zamanda, daxili xəstəliklər və hematologiya üzrə mütəxəssis olan Şükrü Yenice adlı xor ifaçısı Gündoğduya ilkin tibbi yardım göstərib və ürək masajı edib, dayanan ürəyini yenidən işə salıb. Daha sonra Gündoğdu təcili yardımla Nazilli Dövlət Xəstəxanasına aparılıb. Xəstəxanada lazımi müdaxilələr edildikdən sonra evə buraxılıb.
Məlum olub ki, illərdir Nazilli Bələdiyyəsi Lütfi Selek adına Türk Klassik Musiqisi Xorunda xor ifaçısı və solist, həmçinin saz qrupunun üzvü kimi fəaliyyət göstərən Mehmet Gündoğdu Volkan Konak pərəstişkarıdır.
