Türkiyənin ədliyyə naziri Akın Gürlek kapital bazarlarında manipulyativ əməliyyatlarla bağlı aparılan istintaqlar çərçivəsində 404 nəfər barəsində hüquqi tədbirlərin görüldüyünü, 88 şübhəlinin həbs edildiyini açıqlayıb.
Oxu.Az xəbər verir ki, nazir bu barədə sosial şəbəkə hesabında paylaşım edib.
"Kapital bazarlarında manipulyativ əməliyyatlarla bağlı aparılan istintaqlar çərçivəsində indiyədək 404 nəfər barəsində hüquqi tədbirlər görülüb. Onlardan 88-i həbs edilib, 26-sı saxlanılıb, 195 nəfər barəsində isə məhkəmə nəzarəti tədbiri tətbiq olunub.
351 fiziki və 102 hüquqi şəxsin bank hesablarının dondurulması, əmlaklarına həbs qoyulması və daşınmaz əmlaklarının özgəninkiləşdirilməsinin qarşısının alınması barədə qərarlar qəbul edilib", - deyə nazir yazıb.
O bildirib ki, qaçaraq gizlənən 42 şübhəlinin tutulması istiqamətində tədbirlər fasiləsiz davam etdirilir.
Nazir qeyd edib ki, əsassız qazanc əldə etdiyi ehtimal olunan fiziki və hüquqi şəxslərin vəsaitlərini Əmanətlərin Sığortalanması Fondunun nəzdində yaradılmış hesablara qaytarması prosesi də davam edir.
