Ukraynada vurulan təyyarənin 121 sərnişininin meyiti tapılıb – FOTO

İyulun 18-də Ukrayna səmasında vurulan, Amsterdam-Kuala Lumpur marşrutu ilə hərəkət edən və içərisində 298 sərnişinin olduğu Malayziyaya məxsus “Boeing-777” təyyarəsinin düşdüyü ərazidə 121 nəfərin meyiti tapılıb.

Oxu.Az xəbər verir ki, bu barədə məlumatı Ukraynanın Fövqəladə Hallar üzrə Dövlət Xidməti yayıb. Xidmətdən bildiriblər ki, axtarış-xilasetmə işləri Donetsk vilayətinin Rassıpnoye və Qrabovo yaşayış məntəqələri arasında aparılır.

Qeyd edək ki, “Malaysia Airlines” şirkəti həmçinin təyyarədə olan sərnişinlərin siyahısını açıqlayıb. “Boeing-777” təyyarəsində 154 Niderland, 27 Avstraliya, 23 Malayziya, 11 İndoneziya, 6 Britaniya, 4 Almaniya, 4 Belçika, 3 Filippin, 1 Kanada vətəndaşı olub. 47 nəfərin vətəndaşlığı müəyyənləşdirilməyib.

Xatırladaq ki, Ukrayna dövləti sərnişin təyyarəsinin ölkənin şərqində fəaliyyət göstərən silahlı terrorçular – separatçılar tərəfindən “Buk” zenit-raket kompleksi ilə vurulduğunu bildirir.

www.oxu.az