Bakı şəhəri 14 nömrəli tam orta məktəbin səkkiz şagirdi zəhərlənib. Onların saqqızdan zəhərləndiyi ehtimal olunur.
Hadisə ilə bağlı Baku TV-yə açıqlama verən qida üzrə ekspert Mübariz Vəliyev məsələyə aydınlıq gətirib:
"Saqqızın tərkibində bir çox maddələr var. Xiolitol adlanan maddə şəkərsiz saqqızlarda olur. O da insan üçün təhlükəli sayılmır. Sadəcə allergiyası olan insanlar üçün rəngləndirici, ətir verici maddələr təhlükə yarada bilər".
Ekspert şagirdlərdə müşahidə oluna biləcək əlamətlərin zəhərlənmə deyil, məhz allergiyaya xas olduğunu bildirib: dodaqda şişmə, dəridə səpmə, boğazda yanma və qıcıqlanma.
"Bu da zəhərlənmə demək deyil, allergiyadır", - deyə ekspert qeyd edib.
Daha ətraflı Baku TV-nin videomaterialında:
Bakı şəhəri 14 nömrəli tam orta məktəbin səkkiz şagirdinin saqqızdan zəhərlənməsi ehtimalı ilə bağlı bəzi təfərrüat məlum olub.
Belə ki, məktəbdə çalışan şəxslərdən biri bildirib ki, şagirdlər 90 qəpiklik saqqız alıblar və ondan zəhərləniblər:
"Uşaqlar həmin saqqızı qəbul etdikdən sonra onlarda ürəkbulanma başlayıb. Lakin həmin saqqız məktəbdənkənar marketdən alınıb. Uşaqlar onu sinfə gətirib çeynəyib və sonra da vəziyyətləri pisləşib".
Daha ətraflı İctimai TV-nin videomaterialında:
Məktəblilərin zəhərlənməsi ilə bağlı məsələ Azərbaycan Qida Təhlükəsizliyi Agentliyinin (AQTA) regional bölməsi tərəfindən nəzarətə götürülüb.
Bu barədə Oxu.Az-ın sorğusuna cavab olaraq AQTA-dan bildirilib.
Məlumatda qeyd olunub ki, müvafiq qurumlarla birgə araşdırmalara başlanılıb:
"Nəticəsi barədə məlumat veriləcək".
Məhərrəm Əliyev
Dekabrın 11-də saat 9-da Respublika Təcili və Təxirəsalınmaz Tibbi Yardım Mərkəzinə Nəsimi rayonu, 14 saylı orta məktəbdən təcili çağırış qeydə alınıb.
Bu barədə Oxu.Az-ın sorğusuna cavab olaraq Respublika Təcili və Təxirəsalınmaz Tibbi Yardım Mərkəzindən bildirilib.
Məlumatda qeyd olunub ki, çağırış ünvanına təcili tibbi yardım briqadası cəlb olunub:
"Təcili tibbi yardım briqadası tərəfindən Respublika Pediatriya Mərkəzinin nəzdində olan Ə.F.Qarayev adına Uşaq Klinik Xəstəxanasına beş nəfər (kişi cinsli), Nərimanov Uşaq Yoluxucu Xəstəliklər Xəstəxanasına üç nəfər (kişi cinsli) hospitalizasiya olunub.
Onların hər birinə zəruri tibbi xidmətlər göstərilib. Pasiyentlərdən birinə yuxarı tənəffüs yollarının dəqiqləşdirilməmiş infeksiyası, digər yeddi pasiyentə isə kəskin qastrit diaqnozu təyin edilib.
Pasiyentlərin hər birinə zəruri tibbi yardım göstərilib və ambulator müalicə üçün evə buraxılıb".
Bakı şəhəri 14 nömrəli tam orta məktəbin səkkiz şagirdi zəhərlənib.
Bu barədə Oxu.Az-ın sorğusuna cavab olaraq məktəbdən məlumat verilib.
Bildirilib ki, dekabrın 11-də məktəbin 8 şagirdi naməlum səbəbdən özlərini narahat hiss edib.
Qeyd edilib ki, şagirdlərdə ümumi narahatlıq və ürəkbulanma əlamətləri müşahidə edilib: "Məktəb rəhbərliyi tərəfindən dərhal təcili tibbi yardıma müraciət olunub və şagirdlər müvafiq səhiyyə müəssisəsinə çatdırılıb.
Həmçinin məktəb rəhbərliyi digər aidiyyəti dövlət qurumlarına və şagirdlərin valideynlərinə məlumat verib.
İlkin araşdırmalarla məlum olub ki, şagirdlərdən biri dərsə gələrkən məktəbin yaxınlığındakı marketdən saqqız alıb və sinif yoldaşlarına da verib. Ehtimal olunur ki, saqqıza görə uşaqlar özlərini narahat hiss etməyə başlayıblar.
Məsələ ilə bağlı aidiyyəti dövlət qurumları tərəfindən müvafiq araşdırmalara başlanılıb.
Qeyd olunan şagirdlər müvafiq müayinə və uyğun tibbi prosedurlara cəlb olunub. Vəziyyətlərinin qənaətbəxş olduğu bildirilir.
Məhərrəm Əliyev
