Sabirabadda evin yanması nəticəsində xəsarət alan şəxslərin SON DURUMU AÇIQLANDI

Sabirabad baş verən yanğın zamanı xəsarət alanların son vəziyyəti açıqlanıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, aprelin 10-u saat 04:40-da Sabirabad rayonunun Balahəşimxanlı kəndində fərdi yaşayış evində baş vermiş yanğın nəticəsində yeddi nəfər (dörd qadın, üç kişi) Şirvan Şəhər Mərkəzi Xəstəxanasına hospitalizasiya olunub.

"Onların hər birinə zəruri tibbi xidmətlər göstərilib. Altı nəfər ambulator müalicə üçün evə buraxılıb.

2012-ci il təvəllüdlü şəxsə (qadın cinsli) bədənin 99 faizini əhatə edən 3-cü dərəcəli yanıq diaqnozu təyin olunub. Pasiyentə bütün zəruri reanimasiya tədbirləri göstərilib. Vəziyyəti ağır olaraq qiymətləndirilir və ixtisaslaşmış tibb müəssisəsinə təxliyəsi planlaşdırılır", - deyə məlumatda bildirilir.

Sabirabadda evin yanması nəticəsində xəsarət alan şəxslərin SON DURUMU AÇIQLANDI

Əzizə İsmayılova

09:16

Sabirabadda evdə yanğın olub.

Bu barədə Oxu.Az-a Fövqəladə Hallar Nazirliyindən məlumat verilib.

Bildirilib ki, rayonunun Bala Həşimxanlı kəndində ümumi sahəsi 160 m² olan birmərtəbəli 3 otaqlı evin yanar konstruksiyaları yanıb. Yanğın zamanı 5 nəfər yanıq xəsarəti alıb, 2 nəfər tüstüdən zəhərlənib. Bitişik talvar və yaxınlıqdakı tikililər yanğından mühafizə olunub. Yanğın yanğından mühafizə bölmələri tərəfindən söndürülüb.

08:38

Sabirabadda yaşayış evinin yanması nəticəsində bir ailənin 6 üzvü yanıq xəsarəti alıb.

Oxu.Az APA-ya istinadən xəbər verir ki, hadisə Sabirabad rayonunun Bala Həşimxanlı kəndində qeydə alınıb.

Məmmədovlar ailəsinə məxsus fərdi yaşayış evinin yanması nəticəsində 1991-ci il təvəllüdlü Həmidə Heydər qızı Məmmədli, 2012-ci il təvəllüdlü Yasəmən Xalid qızı Məmmədli (vəziyyəti ağırdır), 2013-cü il Nərmin Xalid qızı Məmmədova, 2015-ci il təvəllüdlü Nihad Xalid oğlu Məmmədov, 2022-ci il təvəllüdlü Riyad Xalid oğlu Məmmədov və 1987-ci il təvəllüdlü Xalid Ələddin oğlu Məmmədov müxtəlif dərəcəli yanıq xəsarətləri ilə Şirvan Şəhər Xəstəxanasına yerləşdiriliblər.

Sabirabad rayonunun Yanğından Mühafizə Xidmətinin yanğınsöndürən briqadası hadisə yerinə cəlb olunub və yanğın söndürülüb.

Qeyd edək ki, hadisə nəticəsində 160 kvadratmetrlik ev əşyaları ilə birlikdə yanıb.

Faktla bağlı araşdırma aparılır.