Bakıda keçmiş SSRİ bayraqları ilə yürüş etməyə cəhd göstərməkdə təqsirləndirilən şəxslər barəsində həbs qətimkan tədbiri seçilib.
Oxu.Az xəbər verir ki, istintaq orqanının təqdimatı əsasında Nizami Rayon Məhkəməsində bu barədə qərar qəbul edilib.
Qərara əsasən, Abdulla İbrahimli və İbrahim Əsədli barəsində 3 ay müddətinə həbs qətimkan tədbiri seçilib.
Həmin şəxslərə Cinayət Məcəlləsinin 233-cü maddəsi (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) üzrə ittiham irəli sürülüb.
Sosial şəbəkələrdə kommunist ideologiyasının təbliğinə dair SSRİ bayraqları ilə yürüş etməyə cəhd göstərərək videogörüntülər yayan şəxslər saxlanılıblar.
Oxu.Az-ın məlumatına görə, Daxili İşlər Nazirliyi əməkdaşlarının dünən gecə saatlarında keçirdikləri tədbirlərlə yürüş təşkilatçıları olan İbrahim Əsədli, Abdulla İbrahimli və yürüşdə iştirak etmiş digər şəxslər müəyyən olunaraq saxlanılıblar, barələrində cinayət işi başlanılıb.
İlkin istintaqla həmin şəxslərin başqa bir dövlətin dəstəyi və ayırdığı maliyyə hesabına ofis icarəyə götürərək qrup halında fəaliyyət göstərməsi və vaxtaşırı toplantılar həyata keçirməsi müəyyən olunub.
Adıçəkilən şəxslərə məxsus ofis və mənzillərə baxış zamanı kommunist ideologiyasının təbliğinə yönəlik çoxsaylı materiallar, bayraqlar, radikallığı təbliğ edən kitab nüsxələri, CD-disklər və digər elektron cihazlar aşkarlanaraq götürülüb.
İstintaq tədbirləri davam etdirilir.
Samir Əli
