Qızdırma ilə Zaqatala xəstəxanasına çatdırılan gəncin ölüm səbəbi açıqlandı

Zaqatala rayonu Yeni Suvagil kənd sakini, 1998-ci il təvəllüdlü Əhməd Şüay oğlu Əliyevin ölüm səbəbi açıqlanıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, 1998-ci il təvəllüdlü Ə.Əliyev 25 yanvar saat 13:15-də Zaqatala Rayon Mərkəzi Xəstəxanasının I Təcili və təxirəsalınmaz tibbi yardım şöbəsinə pnevmoniya diaqnozu ilə daxil olub.

"Eyni tarixdə Terapiya şöbəsinə hospitalizasiya olunub və müayinə zamanı xəstədə Giyen Bar sindromu, proqressivləşən polineyropatiya aşkarlanıb.

26 yanvar saat 01:10-da Reanimasiya şöbəsinə hospitalizasiya olunub, oksigen aparatına qoşulub, proqressivləşən tetraparez, Bulbar sindromu diaqnozları təyin edilib, vəziyyəti kritik ağır olaraq dəyərləndirilib.

Göstərilən bütün zəruri tibbi müdaxilələrə baxmayaraq, 30 yanvar saat 08:10-da ölüm faktı qeydə alınıb", - deyə məlumatda bildirilir.

Əzizə İsmayılova

12:56

Zaqatalada gənc oğlan qızdırmadan ölüb.

Oxu.Az Lent.az-a istinadən xəbər verir ki, rayonun Yeni Suvagil kənd sakini, 1998-ci il təvəllüdlü Əhməd Şüay oğlu Əliyev yanvarın 26-da yüksək qızdırma ilə Zaqatala Rayon Mərkəzi Xəstəxanasına daxil olub.

O bu gün müalicə aldığı xəstəxanada dünyasını dəyişib.

Faktla bağlı araşdırma aparılır.