"Arsenal" futbol klubunun İngiltərənin London şəhərində keçirilən çempionluq paradını 750 minlə 1 milyon arasında azarkeş izləyib.
Oxu.Az PA agentliyinə istinadən xəbər verir ki, insanlar İngiltərə Premyer Liqasının qaliblərini daşıyan açıq avtobusun hərəkət etdiyi təxminən doqquz kilometrlik marşrut boyunca düzülüb.
"The Times" qəzeti isə 22 ildən sonra "topçular"ın ilk çempionluğunu qeyd etmək üçün küçələrə təxminən 800 min nəfərin çıxdığını yazıb.
TASS-ın məlumatına görə, klubun doğma stadionuun - "Emirates Stadium" yaxınlığında azarkeşlər futbolçuları görmək üçün mümkün qədər hündür yerlərə qalxmağa çalışıblar. Qırmızı-ağ rəngli formalar geyinmiş insanları ağacların, avtobus dayanacaqlarının və küçə işıqlandırma dirəklərinin üzərində görmək mümkün olub.
İslinqton rayonu boyunca keçirilən parad təxminən iki saat yarım davam edib. Lakin tədbirin başa çatmasından bir neçə saat sonra da azarkeşlər sevimli komandalarının qələbəsini küçələrdə qeyd etməyə davam ediblər.
Bəzi hallarda ictimai asayişin pozulması da qeydə alınıb. Skotland-Yardın yenilənmiş məlumatına görə, 16 nəfər saxlanılıb, onlardan altısı polis əməkdaşlarına hücum etməkdə ittiham olunur. Bir nəfər bıçaq xəsarəti alıb və helikopterlə xəstəxanaya çatdırılıb. Onun vəziyyəti barədə hələlik məlumat verilməyib.
