Avropa çempionatı: Cüdoçularımızdan daha iki medal

Monteneqronun paytaxtı Podqoritsada keçirilən cüdo üzrə Avropa çempionatında Azərbaycan yığması uğurlu çıxışını davam etdirir.

Oxu.Az xəbər verir ki, milli komandamızın daha iki üzvü - Zelim Tçkayev (81 kq) və Murad Fətiyev (90 kq) bürünc medal qazanıblar. Tçkayev üçüncü yer uğrunda görüşdə moldovalı Petru Pelivana, Fətiyev isə fransalı Aleksis Metyuya qalib gələrək fəxri kürsünün üçüncü pilləsində yer alıblar.

Qeyd edək ki, bundan əvvəl Əhməd Yusifov (60 kq) və Rəşid Məmmədəliyev (73 kq) də bürünc medala sahib olublar.

Azərbaycan Avropa çempionatında bu günədək 4 bürünc medal qazanıb. Yarışda ölkəmizi 12 çəki dərəcəsində ümumilikdə 15 cüdoçu (9 kişi, 6 qadın) təmsil edir. Komandamız, həmçinin qarışıq komanda yarışında da mübarizə aparacaq.

16:08

Monteneqronun paytaxtı Podqoritsada cüdo üzrə Avropa çempionatı davam edir.

Oxu.Az idman.biz-ə istinadən xəbər verir ki, yarışın üçüncü günündə Azərbaycan millisinin daha beş idmançısı tatamiyə çıxıb.

Kişilər

81 kq

Zelim Tçkayev 1/16 finalda Orelyen Bonferroni (İsveçrə) ilə güləşib. Qələbə qazanan cüdoçumuz ardınca Dorin Qotonoaqa (Moldova) və Antonio Esposito (İtaliya) ilə duellərdən də qalib ayrılıb. O, yarımfinalda Tato Qriqalaşvili ilə qarşılaşacaq.

Ömər Rəcəbli 1/16 finalda Eetu İhanamakini (Finlandiya) məğlub edib. O, ardınca Mattias Kasse (Belçika) ilə üz-üzə gəlib. Rəqib mərhələ adladığından həmyerlimiz yarışla vidalaşıb.

90 kq

Murad Fətiyev 1/16 finalda Aleksandr Sidoriklə (IJF) qarşılaşıb və inamlı qələbə qazanıb. Yığma üzvü 1/8 finalda İslam Soqenovla (Serbiya) münasibətinə aydınlıq gətirib. Rəqibini məğlub edən Fətiyev növbəti görüşündə Luka Maysuradzeni (Gürcüstan) də üstələyib. O, yarımfinalda Kristian Parlati (İtaliya) ilə görüşdə uğurlu seriyanı davam etdirə bilməyib. Məğlub olan cüdoçumuz bürünc medal uğrunda yarışacaq.

Qadınlar

70 kq

Günel Həsənli 1/32 finalda Anna Oleynik-Korniyenkoya (Ukrayna), Südabə Ağayeva Adelina Novitskiyə (İsrail) uduzub.

Qeyd edək ki, yarışda hələlik Əhməd Yusifovla (60 kq) Rəşid Məmmədəliyev (73 kq) bürünc medal qazanıb. Avropa çempionatına aprelin 27-də yekun vurulacaq.

09:32

Bu gün Azərbaycanın daha beş cüdoçusu Monteneqronun paytaxtı Podqoritsada keçirilən Avropa çempionatında qüvvələrini sınayacaqlar.

Oxu.Az xəbər verir ki, bu barədə Cüdo Federasiyası məlumat yayıb.

Bildirilib ki, kişilərin yarışında Zelim Tçkayev və Ömər Rəcəbli 81 kq, Murad Fətiyev 90 kq çəki dərəcəsində çıxış edəcəklər.

Qadınların mübarizəsinə isə 70 kq çəkidə Südabə Ağayeva və Günel Həsənli qatılacaqlar.

Kişilərin ilk görüşləri 1/16 finala, qadınlarda isə 1/32 finala təsadüf edəcək.

Avropa çempionatı

25 aprel

Kişilər

81 kq

Zelim Tçkayev - Orelyen Bonferroni (İsveçrə);

Ömər Rəcəbli - Jon Vrenozi (Albaniya) / Eetu İhanamaki (Finlandiya) cütünün qalibi.

90 kq

Murad Fətiyev - Aleksandr Sidorik (neytral bayraq altında çıxış edir).

Qadınlar

70 kq

Südabə Ağayeva - Adelina Novitski (İsrail);

Günel Həsənli - Anna Oleynik-Korneyko (Ukrayna).

Qeyd edək ki, indiyədək Azərbaycanın 15 təmsilçisindən yeddisi tatamiyə çıxıb. Onlardan ikisi - Əhməd Yusifov (60 kq) və Rəşid Məmmədəliyev (73 kq) bürünc medala sahib olublar.