Azərbaycan millisinin və "Neftçi"nin sabiq futbolçusu ikiillik fasilədən sonra futbola döndü

Azərbaycan millisinin və "Neftçi"nin sabiq hücumçusu Ruslan Qurbanov 2 illik fasilədən sonra futbola dönüb.

Oxu.Az xəbər verir ki, 33 yaşlı forvard bu məqsədlə Azərbaycana qayıdıb və "Haypers"lə müqavilə imzalayıb. Qurbanovun II Liqada qüvvəsini sınayan Quba təmsilçisi ilə bağladığı kontraktın müddəti 4 aydır.

Sövdələşməyə görə, bölgə komandası onu daha bir il düşərgəsində saxlamaq şansına malikdir.

"Dinamo Stavropol" klubunun yetirməsi Azərbaycana ilk dəfə 2010-cu ildə gəlib və "Neftçi"də çıxış edib.

Millinin sabiq müdafiəçisi Rasim Abışovun təklifi ilə Bakıya ayaq basmış Ruslan 6 il "ağ-qaralar"ın formasını geyinib, bu müddətdə 67 oyuna çıxıb, 19 qol vurub.

Bakılılar onu 2011-2013-cü illər aralığında "Sumqayıt"a icarəyə veriblər. "Kimyaçılar" üçün 9 qola imza atan Qurbanov 2015-ci ilin yayında Xorvatiyaya yollanıb və "Hayduk"la anlaşıb.

Split təmsilçisində özünü göstərə bilməyən, cəmi 6 matçda şans qazanan forvard 2016-ci ilin əvvəlində "Qəbələ"yə keçib. İki il "qırmızı-qaralar"a xidmət edib, ardınca "Səbail"ə keçib.

Növbəti iki mövsümdə isə "Keşlə" və "Zirə"nin heyətində özünü yoxlayıb. 2021-ci ildə Azərbaycanı tərk edib və "Slaviya-Mozır"la müqavilə bağlayıb. Bir il sonra buradan ayrılıb və klubsuz qalıb.