Azərbaycanlı futbolçunun Kosovo klubu ilə müqaviləsinin DETALLARI

Azərbaycanlı futbolçu Elvin Yunuszadənin Kosovo klubu “Fuşe Kosovo” ilə müqaviləsinin detalları müəyyənləşib.

31 yaşlı müdafiəçi “Report”a açıqlamasında yeni komandası ilə “6 ay + 1 il” formatında sözləşmə imzalayacağını bildirib.

Azərbaycan millisinin sabiq üzvü yayda Kosovo təmsilçisində qalıb-qalmayacağına özünün qərar verəcəyini söyləyib: “Müqaviləyə əsasən, mövsümün sonunda qalmaq istəsəm, bir illik sözləşmə qüvvəyə minəcək. Bu, mənim qərarımdan asılı olacaq”.

E.Yunuszadə yaxın günlərdə Kosovonun elita təmsilçisinə qoşulacağını bildirib: “Hazırda viza məsələsini həll etmək üçün İstanbuldayam. “Fuşe Kosovo” təlim-məşq toplanışı üçün 1-2 günə Antalyaya gəlməlidir. Çox güman ki, elə Türkiyədə kollektivə qoşulacağam. Komanda bura gəlməsə, o zaman mən Kosovoya gedəcəyəm”.

Qeyd edək ki, Elvin Yunuszadə cari mövsümün ilk yarısını I Liqa təmsilçisi “İrəvan”da keçirib.