İngiltərə Premyer Liqasında çempion kim olacaq: “Arsenal”, yoxsa “Mançester Siti”? - TƏHLİL

İngiltərə Premyer Liqasının başa çatmasına bir tur qalmış liderlik mövqeyinə yüksəlsə də, “Arsenal”ın çempionluq ehtimalı hələ də sual altındadır.

Oxu.Az xəbər verir ki, bunun əsas səbəbi “Mançeser Siti”nin hələlik bir oyun az keçirməsidir.

Belə ki, sabah “Mançester Siti” çətin “Tottenhem” səfərində qalib gələcəyi təqdirdə “Arsenal”la xal fərqini 2-yə yüksəldəcək. Son turda “Mançester Siti” “Vest Hem”i, “Arsenal” isə “Everton”u qəbul edəcək. “Topçular”ın çempionluq ümidinin davam etməsi üçün “Mançester Siti” klubu “Tottenhem”lə görüşdə xal itkisi ilə üzləşməlidir - ya məğlub olmalıdır, ya da sülhlə barışmalıdır. Amma olduqca yaxşı mövsüm keçirən Pep Qvardiolanın komandası çempionluq titulu üçün son iki görüşdə mütləq qələbə qazanmağa çalışacaq. Komandaların son turda qarşılaşacaqları rəqiblərini müqayisə etsək, “Mançester Siti” klubunun çempionluq şansının daha çox olduğunu görə bilərik.

Xatırladaq ki, hazırda aktivində 86 xalı olan “Arsenal” turnir cədvəlinin lideridir. Bir oyun əskiyi olan “Mançester Siti” 85 xalla 2-ci pillədə qərarlaşıb.

Qeyd edək ki, “Arsenal” klubu sonuncu dəfə 2003/04 mövsümündə İngiltərə Premyer Liqasının  çempionu olub.

Anar Həsənov