Bu gün “MiniBoss Business School Baku” Forumunun komandaları arasında milli çempionat keçirilib.
Oxu.Az xəbər verir ki, tədbir çərçivəsində 14 komanda müxtəlif sahələr üzrə biznes layihələrini yerli biznes ictimaiyyətinin tanınmış sahibkar və investorlarına nümayiş etdiriblər.
“MiniBoss Business School Baku”nun təsisçisi Nərminə Həsənova isə bildirib ki, bu gün keçirilən milli çempionatda 14 komanda öz layihələrini münsiflər heyətinə təqdim edəcək:
“Hər il iyunun 15-də ənənəvi olaraq “MiniBoss Business School”un Startap milli çempionatı keçirilir. Aprel ayında baş tutan Startap Biznes Forumunda 14 komanda öz layihələrinə təqdim edib. Təqdim edilən layihələr müxtəlif qrantlara layiq görülüb. Komandaların hazırladığı məhsulların paytaxtın müxtəlif məntəqələrində “MiniBoss Business School Baku”nun dəstəyi ilə satış nöqtələri təşkil edilib. Bu gün ilk 3-yə çıxan komandalar qalib sayılıb. Qaliblər cari ilin iyul ayında Böyük Britaniyanın Qlazqo şəhərində keçirilən dünya çempionatında iştirak hüququ qazanıblar. Əminəm ki, bizim gənc startapçılarımız orada da bizi layiqincə təmsil edəcəklər”.
Çempionatın yekununda münsiflər heyəti tərəfindən qaliblər müəyyən edilib. Komandalar innovativlik, mənfəətlilik, layihənin əhatə dairəsi, mediada işıqlandırma və münsiflər heyətinin sualına cavablama kimi meyarlar üzrə qiymətləndirilib. Qida, ekologiya, alternativ enerji, İT və bir çox sahələrdə təmsil olunan startaplar arasında ən yüksək nəticə göstərən üç komanda qalib olub. Birinci yerə - “Econotes”, ikinci yerə - “Box from my land” , üçüncü yerə isə - “BeSafe” komandası layiq görülüb.
Qalib komandalara kubok və müxtəlif hədiyyələr təqdim edilib. Ümumilikdə layihədə iştirak edən digər bütün uşaqlara isə sertifikatlar verilib.
Daha çox foto burada: PhotoStock.az
Könül Cəfərli
