"Neftçi" klubunun cəzalandırılan legioneri Ervin Koffi azarkeşlərdən üzr istəyib

"Neftçi" Futbol Mərkəzində "Forza Neftçi" azarkeş qrupunun fəal üzvləri, klub nümayəndələri - baş icraçı direktor Cenk Sümer, media üzrə koordinator Rüstəm Əfsərli və futbolçu Ervin Koffinin iştirakı ilə görüş keçirilib.

Oxu.Az xəbər verir ki, görüşdə "Səbail"lə son qarşılaşmadan sonra baş verənlər müzakirə edilib.

Ervin Koffi oyundan sonra azarkeşlərlə arasında keçən xoşagəlməz insidentə görə təəssüfləndiyini bildirib, matçda sonra yorğunluq və nəticədən irəli gələn stresin gətirdiyi emosiyalarla hərəkət etdiyini, heç bir halda azarkeşlərə hörmətsizlik etmək fikrində olmadığını dilə gətirərək üzr istəyib. Azarkeşlər bunu anlayışla qarşılayaraq, futbolçunun üzrxahlığını qəbul edib, o cümlədən, tribunadan Koffiyə tərəf yad əşya atanın "Forza Neftçi" azarkeş qrupunun üzvlərindən biri olmadığını dilə gətirib.

Klub oyundan dərhal sonra baş verənlərlə bağlı araşdırma apardığını bildirərək, daxili intizam qaydaları əsasında futbolçu haqqında ölçü götürüldüyünü açıqlayıb.

Hər iki tərəf buna bənzər hadisələrin gələcəkdə bir daha yaşanmayacağından əminliyi bildirib.

11:44

"Neftçi" klubunun rəhbərliyi fransalı legioner Ervin Koffini azarkeşlərə qarşı etdiyi hərəkətə görə ağır cəzalandırıb.

Oxu.Az xəbər verir ki, fransalı müdafiəçinin məvacibinin mühüm hissəsi kəsilib.

Buna səbəb isə Premyer Liqanın II turunda "Səbail"lə keçirilən matçdan (1:1) sonra yaşanmış hadisədir.

Belə ki, Bayıldakı qarşılaşmanın ardından "Neftçi" azarkeşləri ilə oyunçuları arasında qalmaqal yaranıb. Fanatlar futbolçuları tənqid etmək üçün tribunaya çağırıblar. Kapitan Emin Mahmudova şikayətlərini dedikləri zaman Ervin Koffi tribunadan uzaqlaşmaq istəyib. Azarkeşlər isə ondan geri qayıtmasını tələb ediblər. Əsəbiləşən müdafiəçi qarşı tərəfə istiqamətlənən su butulkası tullayıb.

Bundan sonra ara qarışıb. Fanatlardan biri meydana daxil olsa da, polis və təhlükəsizlik xidmətinin əməkdaşları müdaxilə edərək, hadisənin böyüməsinin qarşısını alıblar.