"Real Madrid" klubunun ev oyunlarını keçirdiyi "Santyaqo Bernabeu" stadionunun adı dəyişdiriləcək

İspaniyanın "Real" klubunun rəhbərliyi komandanın ev oyunlarını keçirdiyi "Santyaqo Bernabeu" stadionunun adını dəyişdirmək qərarına gəlib.

Oxu.Az Si.com-a istinadən xəbər verir ki, arenanın adı sadələşdirilərək, sadəcə, "Bernabeu" adlandırılacaq. Stadionun adının dəyişdirilməsinin səbəblərinin kommersiya ilə əlaqədar olduğu bildirilib.

Qeyd edək ki, 2019-cu ildə stadionda başladılan yenidənqurma işləri ötən ilin sonuna qədər başa çatmalı idi. Lakin bu müddət uzadılıb. Stadionun yenidən qurulması 1.76 milyard avroya başa gələcək.