Oktyabrın 10-da Azərbaycan Respublikasının əmək və əhalinin sosial müdafiəsi nazirinin müavini İdris İsayev ölkəmizdə səfərdə olan Beynəlxalq Əmək Təşkilatının (BƏT) uşaq əməyinə dair Avropa, Mərkəzi Asiya və ərəb ölkələri üzrə proqram rəhbəri xanım Snezhina Bedalli ilə görüşüb.
Oxu.Az xəbər verir ki, Əmək və Əhalinin Sosial Müdafiəsi Nazirliyindən verilən məlumata görə, İ.İsayev bildirib ki, BƏT-in Azərbaycan tərəfindən ratifikasiya olunmuş 138 nömrəli Konvensiyasına uyğun olaraq, ölkənin Əmək Məcəlləsində uşaqların işə qəbulu üçün minimum yaş həddi 15 yaş müəyyən olunub.
Həmçinin Konvensiyadakı müvafiq prinsip əsasında, Məcəllədə yaşı 18-dən az olan işçilərin əməyindən istifadənin xüsusiyyətləri, əmək şəraiti, iş vaxtının, əmək məzuniyyətinin vaxtı, müddəti və s. baxımından onlar üçün müvafiq təminatlar, güzəştlər əksini tapıb.Nazir müavini işəgötürən tərəfindən 15 yaşına çatmamış şəxslərin işə, habelə onların həyatına, sağlamlığına və ya mənəviyyatına təhlükə törədə bilən fəaliyyətə cəlb edilməsinə görə ölkəmizin İnzibati Xətalar Məcəlləsində nəzərdə tutulan cəza tədbirlərini diqqətə çatdırıb. O bu sahəyə dövlət nəzarətinin daim gücləndiyini, artıq uşaq əməyinin istismarı hallarının getdikcə azaldığını qeyd edib.
İ.İsayev Azərbaycanda tətbiqinə başlanan əmək müqaviləsi bildirişi üzrə elektron informasiya sistemi (EİS) barədə də məlumat verərək bildirib ki, sistemdə artıq 1,3 milyondan artıq əmək müqaviləsi bildirişi qeydə alınıb. Əmək bazarı ilə bağlı geniş informasiya bazasını, həmçinin işçilərin yaş həddini, fotoşəkillərini özündə əks etdirən bu sistem eyni zamanda uşaq əməyinin istismarı hallarının da dərhal aşkar olunmasına imkan verəcək.
Xanım S.Bedalli Azərbaycanda uşaq əməyinin istismarı hallarının aradan qaldırılması sahəsində aparılan işlərin məmnunluq doğurduğunu və BƏT-in gələcəkdə bu işlərdə ölkəmizə dəstək verməyə hazır olduğunu qeyd edib.
Görüşdə qeyd olunan təkliflərlə bağlı fikir mübadiləsi aparılıb.
Gülnarə Zeynalova
www.oxu.az
