Son üç ilin ümumi nəticələrinə nəzər salsaq görərik ki, Azərbaycanda sığorta sektoru maliyyə bazarının inkişafında aktiv rol oynayıb.
“Report” xəbər verir ki, bunu “Azərbaycan Sığortaçılar Assosiasiyası” İctimai Birliyinin icraçı direktoru Elmar Mirsalayev Bakıda “Nailiyyətlər və çağırışlar” mövzusunda keçirilən Azərbaycan Maliyyə Forumunda bildirib.
“Sektor 2021-ci ildə 16%, 2022-ci ildə 18%, 2023-cü ildə isə ilk dəfə sığorta yığımlarının bir milyard manatı ötməsi və onun ÜDM-dəki payının bir faizi keçməsi ilə 28%-dən çox böyüyüb. Peşəkar sığorta bazarı iştirakçıları olaraq başlıca hədəfimiz və məqsədimiz mövcud dayanıqlı böyümənin davamlılığının təmin olunmasıdır. Biz bu məqsədimizə növbəti illərdə də nail olacağımıza əminik. Azərbaycan Mərkəzi Bankının sığortanın inkişafı üçün atdığı mütərəqqi dəstəkləyici addımlar, həyata keçirdiyi fundamental əhəmiyyətli islahatlar bizim əminlik göstəricimizdir”, - deyə o qeyd edib.
