“Azərbaycanda bu ilin ilk 9 ayı ərzində açılan yeni iş yerlərinin 93%-dən çoxu özəl sektora aiddir”.
Oxu.Az xəbər verir ki, bunu Bakıda keçirilən Gömrük Biznes Forumunda çıxışı zamanı Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili deyib. O qeyd edib ki, özəl bölmənin ümumi daxili məhsulda (ÜDM) payı 86,5%, məşğulluqda payı isə 78,0%-dən çoxdur:
“2022-ci ilin dekabrın 9-da “Dövlət-özəl tərəfdaşlığı haqqında” qanun qəbul edilib. Azərbaycanda ÜDM-də özəl sektorun payı 1995-2021-ci illər ərzində 2,8 dəfə artıb”.
Komitə sədri vurğulayıb ki, iqtisadi artım qabaqcıl və effektiv özəl təşəbbüslərə söykənməli, dövlət və özəl əməkdaşlığı gücləndirməlidir:
“Yenilikçiliyə malik özəl sektorda aktivlik daha da canlandırılmalı, qeyri-neft sektorunun maliyyələşməsində özəl sektorun payı artırılmalıdır:
“Özəl sektorun, xüsusilə də kiçik və orta sahibkarlığın iqtisadi artımın və məşğulluğun başlıca mənbəyinə çevrilməsi üçün işgüzar mühit əhəmiyyətli dərəcədə yaxşılaşdırılmalı, məhkəmə-hüquq sistemində şəffaflıq artırılmalı, haqsız rəqabətin qarşısı alınmalıdır. Yeni və şəffaf özəlləşmə strategiyası həyata keçirilməlidir. Biznesin təşviqi mexanizmlərinin iqtisadi səmərəsi artırılmalıdır. Vergi və gömrük siyasəti dövlət büdcəsinin xərclərinin təmin edilməsi üçün adekvat imkanlar yaratmaqla yanaşı, sahibkarlıq fəaliyyətinin stimullaşdırılmasına xidmət etməlidir”.
Aysel Aslan
