"Quru sərhədlərinin qapalı olması amilinin BMT-nin İqlim Dəyişikliyi üzrə Çərçivə Konvensiyasının Tərəflərinin 29-cu Konfransında (COP29) iştirakçı sayına təsir edəcəyi ehtimalını düşünmürük".
Bunu "Report"a açıqlamasında Azərbaycan Respublikası xarici işlər nazirinin müavini və COP29-un baş danışıqçısı Yalçın Rəfiyev deyib.
O vurğulayıb ki, quru sərhədləri Nazirlər Kabinetinin sərəncamında olan məsələdir.
"Həmin dövr üçün qiymətləndirmə müvafiq qurumlarımız tərəfindən aparılıb qərar veriləcək. Əvvəlki COP və digər beynəlxalq tədbirlərlə bağlı təcrübələrə əsasən, yerli sanitariya, epidemioloji vəziyyət həmişə ön planda tutulur. Ancaq ümumi qiymətləndirmə olaraq quru sərhədlərinin qapalı olması amilinin COP29-dakı iştirakçı sayına təsir edəcəyi ehtimalını düşünmürük", - baş danışıqçı əlavə edib.
