Sumqayıt şəhərində qardaşı tərəfindən bıçaqlandığı iddia olunan 11 yaşlı Hüseyn Mahir oğlu Zülfüqarlının son durumu açıqlanıb.
Sumqayıt Tibb Mərkəzinin İctimaiyyətlə əlaqələr bölməsi Lent.az-a yeniyetmənin son vəziyyəti barədə açıqlama verərək bildirib ki, 2012-ci il təvəllüdlü, Sumqayıt şəhəri Corat qəsəbə sakini Hüseyn Mahir oğlu Zülfüqarlı avqustun 21-də saat 00:45-də TƏBİB-in tabeliyindəki Sumqayıt Tibb Mərkəzinin Uşaq xəstəxanasına daxil olub. Xəstəyə travmatik hemopnevmotoraks diaqnozu qoyulub.
Vəziyyətə uyğun olaraq cərrahi əməliyyat olunub. Vəziyyəti keçirdiyi əməliyyata uyğun olaraq, stabil ağırdır.
11:24
Coratda anasını öldürüb, qardaşına xəsarət yetirməkdə şübhəli bilinən 16 yaşlı oğlan tutulub.
Bu barədə Daxili İşlər Nazirliyi (DİN) məlumat yayıb.
Məlumata görə, polis əməkdaşları anasını kəsici alətlə qətlə yetirməkdə və qardaşına xəsarət yetirməkdə şübhəli bilinən 2007-ci il təvəllüdlü Əlfüqar Mahir oğlu Zülfüqarlını saxlayaraq istintaqa təhvil veriblər.
08:58
Avqustun 21-də saat 3 radələrində Sumqayıt şəhəri Corat qəsəbəsində 1986-cı il təvəllüdlü Günay Zülfüqarovanın kəsilmiş-deşilmiş xəsarətlərdən ölməsi, azyaşlı oğlunun isə xəsarət alması faktı üzrə Cinayət Məcəlləsinin 120.1 (qəsdən adam öldürmə) və 29,120.2.7-ci (iki şəxsi qəsdən öldürməyə cəhd etmə) maddələri ilə cinayət işi başlanıb.
Bu barədə Sumqayıt Şəhər Prokurorluğundan məlumat verilib.
Qeyd olunub ki, hazırda cinayəti törətməkdə şübhəli bilinən şəxs və ya şəxslərin müəyyən olunaraq məsuliyyətə cəlb olunması istiqamətində istintaq-əməliyyat tədbirləri davam etdirilir.
Nəticəsi barədə əlavə məlumat veriləcək.
