Bakıda ustanı qətlə yetirməkdə ittiham olunan Ceyhun Babayevin barəsindəki cinayət işinin məhkəmə baxışı keçirilib.
Oxu.Az-ın məlumatına görə, Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən iclasda prokuror təqsirləndirilənə ittiham aktını elan edib. Vaxt məhdudiyyətindən təqsirləndirilənin sərbəst ifadəsinin dinlənilməsi növbəti prosesə təxirə salınıb.
Məhkəmənin növbəti baxış iclası dekabrın 1-nə təyin edilib.
Qeyd edək ki, hadisə 2026-cı il iyulun 11-də Bakının Xəzər rayonu Binə Atçılıq yaşayış massivində baş verib. Həmin ərazidə yaşayan 45 yaşlı Xalid Bağırovun çoxsaylı bıçaq zərbələri ilə qətlə yetirilməsi barədə polisə məlumat daxil olub.
Araşdırmalarla məlum olub ki, Xalid Bağırov ərazidəki evlərdən birinə internet kabelinin çəkilişi zamanı işlədiyi evin sahibinin qonşusu olan Ceyhun Babayev tərəfindən qətlə yetirilib. Hadisədə şübhəli bilinən şəxs saxlanılaraq istintaqa təhvil verilib.
Məlumata görə, tərəflər arasında mübahisəyə internet çəkilişi zamanı istifadə olunan kabelin qırıntılarının küçəyə düşməsi səbəb olub.
Buna görə iradını bildirən Ceyhun Babayev onunla mübahisə edib və bir qədər sonra qonşunun evinə daxil olaraq Xalid Bağırova çoxsaylı bıçaq zərbələri endirib. Bir qədər sonra o, Xalid Bağırovun öldüyünə əmin olmaq üçün geri qayıdaraq daha bir neçə bıçaq zərbəsi endirib və hadisə yerindən uzaqlaşıb.
Meyitin ekspertizası zamanı ustanın bədənində 36 bıcaq zərbəsi müəyyən edilib.
Ceyhun Babayev barəsində CM-nin 120.2.4-cü (xüsusi amansızlıqla və ümümi təhlükəli üsulla qəsdən adam öldürmə ) maddəsi ilə cinayət işi açılaraq ittiham irəli sürülüb.
Elgün Həsənli