Tbilisidə Narkotiklərin qanunsuz dövriyyəsi İdarəsinin əməliyyatı nəticəsində iki polis xəsarət alıb.
Oxu.Az “Sputnik-Georgia” agentliyinə istinadla xəbər verir ki, əməliyyat DİN əməkdaşları tərəfindən avqustun 11-də Poniçala rayonunda keçirilib.
“Hüquq-mühafizə əməkdaşları Poniçalaya gedən Toyota markalı avtomobilin sürücüsünə saxlamaq əmri verib. O, polislərin qanuni tələbinə məhəl qoymayaraq müqavimət göstərib və polisin ximdəti maşını ilə toqquşub. Bundan sonra o, soyuq silahla iki polisə xəsarət yetirib və qaçıb”, - DİN-nin məlumatında deyilir.
Məlumata əsasən, sərnişin Namiq P. də polislərə müqavimət göstərib və saxlanılıb.
Saxlanılan şəxsin üzərində və avtomobildə aparılmış axtarış zamanı polislər 26 bağlama toza bənzər maddə aşkar ediblər. Tapılan bağlamalar ekspertizaya verilib.
Namiqə qarşı “Narkotiklərin qanunsuz saxlanılması” və “Polisə müqavimət göstərmə” maddələri ilə cinayət işi açılıb. Avtomobildə olan ikinci şəxsin axtarışları davam etdirilir.
