:1200.jpg)
İyulun 19-da Mingəçevir Şəhər Prokurorluğunda intihar edən 32 yaşlı Turalə Aslanovanın cinayət işində adları hallanan şəxslər işdən çıxarılıblar.
“Qafqazinfo”nun əldə etdiyi məlumata görə, dələduzluq işində adları hallanan Kəmalə Quliyeva və Samir Cabbarlı daxili işlər orqanlarından xaric ediliblər.
K.Quliyeva DİN-in Baş Pasport Qeydiyyat və Miqrasiya İdarəsinin Gəncə Şəhər Şöbəsində, S.Cabbarlı isə Mingəçevir Şəhər Polis Şöbəsinin Dövlət Yol Polisi Bölməsində işləyiblər.
S.Cabbarlının T.Aslanova ilə yaxın əlaqələrinin olduğu bildirib.
Bildirilib ki, bu işin araşdırılması ilə bağlı müvafiq tapşırıqlar verilib. Hər iki şəxs də araşdırmaların nəticəsində işdən çıxarılıb.
Qeyd edək ki, prokurorluq binasından özünü ataraq intihar edən T.Aslanova DİN-in Baş Pasport Qeydiyyat və Miqrasiya İdarəsinin Gəncə Şəhər Şöbəsində işləyib. O, dələduzluq əməlləri ilə bağlı şikayətlər daxil olandan sonra 2022-ci ildə tutduğu vəzifədən və polis sıralarından uzaqlaşdırılıb.
Həmçinin məlum olub ki, o, bir neçə şəxsdən iş qurmaq və əlavə pul qazanmaq vədi ilə ümumilikdə 413 min manat məbləğində pul alıb.
T.Aslanovanın vəkili Emin Kiçibəyov açıqlamasında bildirib ki, T.Aslanova ölümündən əvvəl verdiyi ifadələrində aldığı pulları Kəmalə Quliyevaya verdiyini bildirib.
