Vişnevski adına Mərkəzi Hərbi Hospitalda (Rusiya) ənənəvi üsulların kömək etmədiyi xəstələrdə fantom ağrıların müalicəsi üçün arı zəhərindən istifadə edilir.
Oxu.Az bildirir ki, bu barədə gazeta.ru-ya rusiyalı apiterapevt, tibb elmləri namizədi Viktor Qubin danışıb.
Qeyd olunur ki, prosedur zamanı arılar xəstələri bel və boyun nahiyələrindən, həmçinin akupunktur sxemlərinə uyğun digər nöqtələrdən sancırlar.
"Arı iynəsi avtomatik şprisdir. Sancmadan sonra iynə sancıldığı yerdə qalır və daha yarım saat ərzində zəhər ifraz edir. Doza fərdi olaraq seçilir", - deyə Qubin izah edib.
Onun sözlərinə görə, müalicə bir arı ilə başlayır və tədricən hər seansda 6-8 sancmaya qədər artırılır. Arı zəhəri bəzən temperaturu yüksəldərək və intoksikasiya yaradaraq orqanizmi stimullaşdırır, bu səbəbdən müalicə kursuna başlamazdan əvvəl allergiyanı istisna etmək üçün biosınaq keçirilir.
"Təxminən 5% insanda anafilaktik şok inkişaf edə bilər, ona görə də biz həmişə xəstəyə nəzarət edirik", - deyə həkim qeyd edib.
Fantom ağrılar zamanı arılar vegetativ sinir sisteminin mərkəzləri də daxil olmaqla birbaşa amputasiya edilən yerə və digər zonalara qoyulur. Qubin etiraf edib ki, zəhərin dəqiq təsir mexanizmi tam öyrənilməyib, lakin effekti aşkardır: ətrafları amputasiya edilmiş xəstələr ciddi yan təsirləri olan güclü ağrıkəsicilərdən imtina edə bilərlər.
