19 
Yan
2023
15:06
196
8
1235
Virtual karabakh

Azərbaycandakı diplomatik nümayəndələr Şəhidlər xiyabanını ziyarət ediblər - YENİLƏNİB + FOTO

19 Yan, 2023
15:06
1235

Azərbaycandakı diplomatik nümayəndələr Şəhidlər xiyabanını ziyarət ediblər - YENİLƏNİB + FOTO

Özbəkistan, Qazaxıstan, Qırğızıstan, Tacikistan və Serbiyanın Azərbaycandakı səfirləri 20 Yanvar - Ümumxalq Hüzn Günü ilə əlaqədar Şəhidlər xiyabanını ziyarət edib.

Özbəkistan səfiri Bəhram Əşrəfxanov “Twitter”də paylaşım edib.

“Digər ölkələrin səfirləri ilə birlikdə Bakıdakı Şəhidlər xiyabanını ziyarət etdik, 20 Yanvar faciəsi qurbanlarının məzarları üzərinə gül dəstələri düzüb, xatirəsini ehtiramla yad etdik. Allahdan rəhmət diləyirəm!”, - paylaşımda deyilir.

Özbəkistan səfiri Bəhram Əşrəfxanovla yanaşı, Serbiya səfiri Draqan Vladisavljeviç, Qırğız Respublikasının səfiri Kayrat Osmonaliyev, Tacikistan səfiri Rustam Soliyev və Qazaxıstan səfiri Serjan Abdıkarimov ziyarətdə iştirak edib.

14:56

Xarici ölkələrin Azərbaycandakı səfirləri 20 Yanvar faciəsinin 33-cü ildönümü ilə əlaqədar Şəhidlər xiyabanını ziyarət ediblər.

“Report”un xəbərinə görə, diplomatlar şəhidlərin xatirəsini ehtiramla anıb, məzarları önünə güllər düzüblər.

Ziyarətdə Avropa İttifaqının Azərbaycandakı nümayəndəliyinin rəhbəri Peter Mixalko, Almaniya səfiri Ralf Horlemann, İsveç səfiri Tobias Lorentzson, Slovakiya səfiri Milan Layçak, İtaliya səfiri Klaudio Taffuri, Böyük Britaniya səfiri Ferqus Old, Xorvatiya səfiri Branko Zebiç, İspaniyanın Azərbaycandakı müvəqqəti işlər vəkili Patrisia Serrano Sançez, Yaponiya səfiri Cuniçi Vada, İran səfiri Seyid Abbas Müsəvi və başqa diplomatlar iştirak ediblər.

Qeyd edək ki, 1987-ci ilin sonlarında yenidən ortaya atılmış qondarma Dağlıq Qarabağ problemi Azərbaycanın ərazi bütövlüyünün pozulmasına, torpaqlarımızın işğalına, Ermənistanda və Dağlıq Qarabağda yaşayan yüzminlərlə azərbaycanlının öz doğma yurdlarından qovulmasına yönəlmişdi. Keçmiş Sovet İttifaqının iki respublikası arasında başlanan bu münaqişə XIX-XX yüzilliklərdə ermənilərin Azərbaycan torpaqlarında ardıcıl məskunlaşdırılması, habelə xalqımıza qarşı məqsədyönlü şəkildə aparılmış etnik təmizləmə və soyqırımı siyasətinin növbəti mərhələsi idi.

Ermənistan SSR-in respublikamıza ərazi iddialarına, radikal erməni millətçiləri tərəfindən qızışdırılan separatizmə və soydaşlarımız əleyhinə törədilən kütləvi zorakılıqlara SSRİ rəhbərliyinin bilavasitə və ya dolayısı ilə dəstək verməsi, habelə Azərbaycanın ozamankı rəhbərlərinin cinayətkar qətiyyətsizliyi və milli maraqlara zidd addımları xalqımızı respublikanın ərazi bütövlüyünün qorunması naminə ayağa qalxmağa sövq etdi. Beləliklə, respublikada geniş sosial spektrli xalq hərəkatı yarandı və proseslərin gedişi onun tədricən milli azadlıq hərəkatına çevrilməsinə zəmin yaratdı.

1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib. Sovet ordusunun xüsusi təyinatlı dəstələrinin və daxili qoşunların iri kontingentinin Bakını zəbt etməsi xüsusi qəddarlıq və misli görünməmiş vəhşiliklə müşayiət edilib. Fövqəladə vəziyyətin tətbiqi əhaliyə elan olunanadək hərbi qulluqçular 82 nəfəri amansızcasına qətlə yetirib, 20 nəfəri ölümcül yaralayıb. Fövqəladə vəziyyət elan edildikdən sonra isə bir neçə gün ərzində Bakı şəhərində 21 nəfər öldürülüb. Fövqəladə vəziyyətin elan olunmadığı rayon və şəhərlərdə - yanvarın 25-də Neftçalada və yanvarın 26-da Lənkəranda daha 8 nəfər qətlə yetirilib.

Beləliklə, qoşunların qanunsuz yeridilməsi nəticəsində Bakıda və ətraf rayonlarında 131 nəfər öldürülüb, 744 nəfər yaralanıb.

Bizimlə əlaqə saxlayın

Digər Siyasət xəbərləri