13 dəfə ürəyi dayanan "Netflix"in 11 yaşlı ulduzu öldü

"Netflix"də yayımlanan "Sintonia" serialındakı rolu ilə tanınan 11 yaşlı aktrisa Millena Brandao mayın 2-də vəfat edib.

Oxu.Az xəbər verir ki, bu barədə TMZ məlumat verib.

Qeyd olunur ki, ölümün səbəbi barədə rəsmi açıqlama verilməyib. Eyni zamanda, bir sıra KİV ölümündən bir müddət əvvəl qızın ən azı 13 ürəktutması keçirdiyini yazıb.

"Splash" nəşrinin verdiyi məlumata görə, Millena Brandao ilk dəfə aprelin 28-də Braziliyanın San-Paulo şəhərindəki klinikaya müraciət edib. O, qızdırma, bədəndə ağrılar və başağrısından şikayətlənib. Ona dərman təyin etdikdən sonra buraxılıb. Ertəsi gün qız daha ağır vəziyyətdə yenidən xəstəxanaya yerləşdirilib və bundan sonra həkimlərin nəzarəti altında olub.

Hadisə ilə bağlı araşdırmalara başlanılıb. Qızın valideynləri polisə ərizə veriblər. Zərərçəkmiş tərəfin vəkili bildirib ki, ailə faciəyə həkim səhlənkarlığının səbəb ola biləcəyini istisna etmir.