Rusiyalı məşhur aktyor Yefremovun həbsxanada vəziyyəti kəskin pisləşdi: Danışa bilmir

Rusiyanın tanınmış aktyoru Mixail Yefremovun vəziyyəti kəskin pisləşib, o, çətinliklə nəfəs alır və demək olar ki, danışa bilmir.

Oxu.Az-ın məlumatına görə, bu barədə "Shot" "Telegram" kanalı xəbər yayıb.

Bildirilib ki, aktyorda xroniki obstruktiv ağciyər xəstəliyinin kəskinləşməsi baş verib.

"60 yaşlı Yefremovun vəziyyətinə nəzarət etmək üçün hər gün həkimə getməsi tələb olunur, çünki ağciyər xəstəliyi tənəffüs çatışmazlığına səbəb ola bilər, həmçinin ağciyər infeksiyası, sümük kövrəkliyi və ürək fəaliyyətinin pozulması kimi əlaqəli xəstəliklərin inkişafı riskini artırır. Ağciyər problemlərinə görə aktyor hətta siqareti tərgidib", - deyə mənbədən bildirilib.

Məlumata görə, hazırda Yefremovun müdafiəsi şərti və ya vaxtından əvvəl azad olunma üçün sənədlər hazırlayır, lakin aktyor səhhətinin pisləşməsi səbəbindən vəkillərlə danışa bilmir.

Azad olunduqdan sonra ona tam müayinə və müntəzəm həkim yardımı lazım olacaq.