ABŞ Dövlət Departamenti Ermənistanda investisiya mühiti ilə bağlı problemləri bəyan etdi

"Ermənistanda investisiya mühiti ilə bağlı problemlər arasında Ermənistanın bazarının kiçikliyi, qanunun aliliyinin və məhkəmə sisteminin zəifliyi, həmçinin korrupsiya irsi daxildir".

Oxu.Az-ın verdiyi məlumata görə, bu barədə ABŞ Dövlət Departamentinin 2024-cü il üçün investisiya mühiti ilə bağlı hesabatında deyilir.

Sənəddə vurğulanıb ki, qanunlar xüsusən əsas institutlarda, ən çox da məhkəmə sistemində müstəqillik, bacarıq və ya peşəkarlığın olmaması nəticəsində pozulur.

"Çox vaxt əlavə məhkəmə-tibbi ekspertizası tələb olunduqda müvafiq rəy alınana qədər iş dayandırıla bilər ki, bu da prosesi bir neçə ay uzadır. Müəssisələr qeyd edirlər ki, ümumi yurisdiksiya məhkəmələrindəki bir çox hakimlər yuxarı instansiya məhkəmələrinin hakimlərindən məsləhət almadan qərar qəbul etməkdə tərəddüd edə bilərlər. İctimai rəy belədir ki, qərarlara qanun və ayrı-ayrı işlərin mahiyyətindən başqa, digər amillər təsir edə bilər".

Bildirilir ki, özəl sektor nümayəndələri hökumətlə dialoqun keyfiyyətindən narahatdırlar:

"İnvestorlar, həmçinin, dövlət məmurlarının qarşılaşdıqları problemləri operativ həll etmək qabiliyyəti ilə bağlı problemləri olduğunu qeyd ediblər. Biznes qrupları və beynəlxalq təşkilatlar da hökumətin bir neçə böyük özəl şirkətdə kiçik səhm paketlərini alması ilə bağlı narahatlıqlarını dilə gətiriblər".

Həmçinin, sənəddə dövlət məmurlarının investorların qarşılaşdıqları problemləri operativ həll etmək qabiliyyətinin olmaması vurğulanıb.

Dövlət Departamenti digər məsələlərlə yanaşı, Ermənistanda istehlakçıların məhdud alıcılıq qabiliyyəti ilə bağlı problemlərə də işarə edib, həmçinin iş adamlarının qanunun aliliyi, bərabər rəftar və dövlət məmurlarının etik davranışı ilə bağlı narahatlıqlarını qeyd edib.

"Ermənistan hökumətinin üç böyük xarici şirkətdə mülkiyyət paylarını aydın kompensasiya və ya meyarlar olmadan alması onun siyasəti barədə suallar doğurub. ABŞ şirkətləri bildiriblər ki, əqli mülkiyyət hüquqlarının (ƏMH) qorunmasının təmin edilməməsi səbəbindən investisiya mühiti korlanıb. Bu, hökumətin əlaqəli hüquqların təmin edilməsini gücləndirməyi öhdəsinə götürməsinə baxmayaraq, belədir. Müstəqil və güclü məhkəmə sisteminin olmaması ilə bağlı narahatlıqlar var; bu, hökumətin bərabər rəftar və şəffaflıq təminatlarını zəiflədir, investisiya və ya kommersiya mübahisələri hallarında səmərəli hüquqi müdafiə vasitələrinə çıxışı məhdudlaşdırır", - deyə hesabatda vurğulanıb.