"Prezident İlham Əliyevin rəhbərliyi ilə həyata keçirilən siyasət bir tərəfdən Azərbaycanın dayanıqlı və inklüziv inkişafının təmin olunmasına şərait yaradır, digər tərəfdən isə ölkəmizin iqtisadi təhlükəsizliyini formalaşdırır və gücləndirir".
Bu sözləri Oxu.Az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü, deputat Vüqar Bayramov deyib.

O bildirib ki, Azərbaycan borclanmadan inkişaf edir:
"Bunun ən böyük özəlliyi ondan ibarətdir ki, bu inkişaf modeli gələcək nəsillər üçün bu gün formalaşdırılan iqtisadi dəyərin qorunub saxlanılmasına imkan yaradır. Çünki inklüziv inkişaf gələcək nəsillərə borc deyil, müasir infrastruktur və iqtisadi dəyər miras qoyulmasını özündə ehtiva edir".
Deputat qeyd edib ki, Azərbaycanda xarici borcun ümumi daxili məhsulda (ÜDM) payı birrəqəmli göstərici ilə ifadə olunur:
"Bu, dünyada ən yaxşı göstəricilərdən biridir. Eyni zamanda, Azərbaycanın dövlət ehtiyatları xarici borcunu 20 dəfə üstələyir. Bu da praktik olaraq dünyada ən yaxşı göstəricilərdən hesab olunur. Təbii ki, iqtisadiyyatın şaxələndirilməsi və neftdən asılılığın aradan qaldırılması daim prioritet məsələlərdəndir. Növbəti ilin dövlət büdcəsində qeyri-neft sektorunun payı ilk dəfə olaraq 60 faizdən çox olacaq. Eyni zamanda, qeyri-neft sektorundan daxilolmalar cari xərclərin 90 faizindən çoxunu qarşılayacaq. Bu isə müdafiə olunan xərclərlə müqayisədə 25 faiz daha yüksək göstərici deməkdir. Bütün bunlar onu göstərir ki, iqtisadiyyatın, xüsusən də fiskal gəlirlərin şaxələndirilməsi dayanıqlı iqtisadi inkişaf üçün zəmin yaradıb".
"Hədəf növbəti dövrlərdə də iqtisadiyyatın şaxələndirilməsini genişləndirmək, neftdən asılılığı minimuma endirmək, xüsusən də ümumi daxili məhsulda, büdcə gəlirlərində, eləcə də ümumi ixracda qeyri-neft sektorunun payını daha da artırmaqdır", - deyə deputat əlavə edib.