Deputat: “Əlillik təyinatı almayan qazilərin təminatı ilə bağlı problemlər var”

“Əlillik təyinatı almayan, ancaq qazi olan vətəndaşlarımızın dərman və digər təminatlarında müəyyən problemlər var. YAŞAT Fondu bu istiqamətdə yardımlar etsə də, məsələ ümumilikdə həllini tapsa, yaxşı olar”.

“Report” xəbər verir ki, bu fikirləri Milli Məclisin deputatı Arzu Nağıyev parlamentin Əmək və sosial siyasət komitəsinin bugünkü iclasında deyib.

O həmçinin VÖEN-i olmasına baxmayaraq heç bir yerdə işləməyən şəxslərin sayının da kifayət qədər çox olduğunu bildirib:

“Həmin şəxslərin ümumi sayı ilə bağlı yekun rəqəmlər səsləndirilməlidir. Eyni zamanda internat evlərindən çıxan qızların işlə təminatında ciddi addımlar atılmalıdır. Oğlanlar bir çox işlərdə çalışsalar da, qızlar bu sahədə çətinliklərlə üzləşirlər. Ona görə də məsələyə ciddi yanaşılmalıdır”.