MEDİA: "Azadlıq Radiosu" parlament seçkiləri ilə bağlı ictimai rəyi manipulyasiya edir"

"ABŞ Konqresi tərəfindən maliyyələşən "Azadlıq Radiosu" Azərbaycanda Milli Məclisə növbədənkənar seçki ilə bağlı ictimai rəyi manipulyasiya etməyə yönəlmiş materiallar yayımlamaqdadır".

Oxu.Az xəbər verir ki, bu barədə Azərbaycan Respublikasının Medianın İnkişafı Agentliyinin (MEDİA) açıqlamasında deyilir.

Agentlik təəssüflə bildirib ki, bu məlumatlar "jurnalist qeydləri" başlığı altında paylaşılır:

"Qeyd edək ki, qanunvericiliyin tələbinə uyğun olaraq Azərbaycan Respublikası Xarici İşlər Nazirliyində akkreditasiyadan keçmiş bütün xarici media subyektlərinin seçkini işıqlandırmaq üçün Mərkəzi Seçki Komissiyasına müraciətinə müsbət cavab verilmişdir. Lakin "Azadlıq Radiosu"nun bununla bağlı hər hansı müraciəti olmamışdır. "Azadlıq Radiosu"nun mənbəyi bilinməyən, qərəzli məlumatları anonim "jurnalist qeydi" altında paylaşması jurnalist adından sui-istifadə halıdır və birmənalı olaraq media etikası prinsiplərinə ziddir. Qeyd olunanlar fonunda medianın manipulyasiya metodu ilə ictimai rəyi çaşdırmaq cəhdlərini yolverilməz hesab edir və qınayırıq".