Tarixdən dərs çıxaran Gürcüstan seçimini etdi - Azərbaycanla müttəfiqliyin önəmi

"Hazırda Gürcüstan keçmişi ilə gələcəyi arasında həssas keçid mərhələsini yaşayır. O, Rusiyanın yanında deyil, ola da bilməz. Səbəb çox sadədir. Nə qədər ərazi bütövlüyü tam bərpa olunmayıb, Gürcüstanın Rusiya ilə nəinki dost, hətta mehriban qonşu kimi davranması da çətindir".

Bu fikirlər Gürcüstan Prezidenti Mixeil Kavelaşvilinin Azərbaycana səfərinin əhəmiyyəti şərh edilərkən Baku TV-nin "Yekunlaşdıraq" verilişində səsləndirilib.

Əlavə edilib ki, eyni zamanda, Tbilisi Qərbin də qapılarını çırpıb və ona sırımaq istədiyi dəyərlərdən üz döndərib. Hazırda buna görə kifayət qədər ədalətsiz münasibətlərlə üzləşir.

"Tutulan mövqe doğrudur. Amma doğru mövqelərdə durmaq adətən çətin olur. Məşhur əsərdə deyilirdi ki, dörd tərəflə dava etmək olmaz. Mütləq tərəflərin birinə kürəyini söykəməlisən. Gürcüstan üçün kürəyini söykədiyi həmin o tərəf, etibarlı qonşusu Azərbaycandır. Yazılmamış qanunların dəyərlərinin əhəmiyyətini başa düşmək siyasətdə vacibdir. Çox vaxt məhz onların pozulması böyük işlərin yarımçıq qalmasına səbəb olur. Azərbaycanla Gürcüstanın timsalında bunun baş verməsini heç kim istəməzdi. Çünki ölkələr həqiqətən də böyük işlərlə məşğuldurlar", - deyə şərhdə qeyd edilib.

Ətraflı videomaterialda:

Tarixdən dərs çıxaran Gürcüstan seçimini etdi - Azərbaycanla müttəfiqliyin önəmi