"Prezident İlham Əliyevin Türk Dövlətləri Təşkilatına (TDT) üzv ölkələrin təhlükəsizlik üzrə rəhbər şəxslərini qəbul etməsi və Təhlükəsizlik Şuraları Katiblərinin 5-ci görüşünün ilk dəfə Bakıda keçirilməsi TDT çərçivəsində əməkdaşlığın yeni istiqamətlər üzrə dərinləşdiyini göstərir".
Bunu Oxu.Az-a açıqlamasında Beynəlxalq Münasibətlərin Təhlili və Multikulturalizm Mərkəzinin baş məsləhətçisi, Mərkəzi Asiya ölkələri üzrə ekspert Roza Bayramlı deyib.
O bildirib ki, diqqəti cəlb edən əsas məqam təhlükəsizlik məsələlərinin artıq təşkilatın gündəliyində daha sistemli və institusional xarakter almasıdır:
"Prezident İlham Əliyevin toplantı iştirakçılarına müraciətində də təhlükəsizlik şuraları arasında mütəmadi dialoqun ortaq təhdid və risklərin müəyyənləşdirilməsi və onların neytrallaşdırılması baxımından əhəmiyyəti xüsusi vurğulanıb. Bu prosesdə Azərbaycanın rolu bir neçə istiqamətdə özünü göstərir. Azərbaycan həm TDT daxilində siyasi dialoq üçün platforma təqdim edir, həm də əməkdaşlığın praktiki məzmununun genişləndirilməsinə töhfə verir. Bakıda təhlükəsizlik şuraları katiblərinin toplantısının keçirilməsi də bunun konkret nümunəsidir. Bugünkü gündəlik göstərir ki, beynəlxalq terrorçuluq, transmilli mütəşəkkil cinayətkarlıq və narkotiklərin qanunsuz dövriyyəsi ilə yanaşı, dini ekstremizm, hibrid təhdidlər və kritik infrastrukturun qorunması da prioritet istiqamətlər kimi müəyyən edilir.
Xüsusilə kritik infrastruktur məsələsi Azərbaycan üçün strateji əhəmiyyət daşıyır. Azərbaycan Mərkəzi Asiyanı Xəzər dənizi, Cənubi Qafqaz və Türkiyə vasitəsilə Avropa ilə birləşdirən əsas nəqliyyat və enerji marşrutlarının üzərində yerləşir. Orta Dəhlizin əhəmiyyətinin artması ilə onun təhlükəsizliyi, eləcə də limanların, dəmir yollarının, enerji və rəqəmsal infrastrukturun qorunması, kibertəhlükələrə qarşı dayanıqlılıq və dövlətlər arasında operativ informasiya mübadiləsi də bu gündəliyin tərkib hissəsinə çevrilir", - deyə müsahibimiz vurğulayıb.
R.Bayramlı əlavə edib ki, Azərbaycan TDT-nin beynəlxalq çəkisinin artmasını onun praktik imkanlarının genişlənməsi ilə əlaqələndirir:
"Təşkilatın gələcək inkişafı üzv dövlətlərin konkret məsələlərdə koordinasiya qabiliyyətinə əsaslanacaq. Bu baxımdan Bakı toplantısının əsas mesajlarından biri ondan ibarətdir ki, türk dövlətləri təhlükəsizlik sahəsində də ortaq çağırışlara daha koordinasiyalı cavab verməyə çalışırlar. Azərbaycanın mövqeyi isə siyasi dialoq, strateji bağlantılar və təhlükəsizlik əməkdaşlığını bir-birini tamamlayan istiqamətlər kimi inkişaf etdirməkdir".
