Bakıda yaşayış binasındakı yanğın söndürülüb - YENİLƏNİB + FOTO/VİDEO

Bakının Yeni Yasamal yaşayış massivində, Əsəd Əhmədov küçəsində yerləşən çoxmərtəbəli binada başlayan yanğın söndürülüb.

“Yeni Yasamalda binanın altında qeyri-yaşayış obyektində yanğın başlaması ilə bağlı daxil olan məlumat əsasında əraziyə yanğından mühafizə xidmətinin bölmələri cəlb ediliblər”.

Bunu Oxu.Az-a açıqlamasında Fövqəladə Hallar Nazirliyinin Dövlət Yanğından Mühafizə Xidmətinin bölmə rəisinin müavini Tural Zahidov deyib.

O bildirib ki, ölüm və xəsarət alan yoxdur.

Qurumdan, həmçinin bildirilib ki, hadisə yerində əməliyyat şəraiti qiymətləndirilərkən məlum olub ki, 16 mərtəbəli yaşayış binasının zirzəmisində fəaliyyət göstərməyən və təmirsiz qeyri-yaşayış obyektində baş vermiş yanğının binanın digər mərtəbələrinə keçmə riski yüksəkdir.

Yanğınsöndürənlərin həyata keçirdikləri operativ və təxirəsalınmaz tədbirlər sayəsində yanğın genişlənməsinə imkan verilmədən qısa müddətdə söndürülüb.

Yanğın nəticəsində zirzəmidə yerləşən ümumi sahəsi 4 kv.m olan gözətçi otağının yanar konstruksiyaları və ümumi sahəsi 120 kv.m olan obyektdə müxtəlif tullantılar yanıb.

Obyekt və mənzillər yanğından mühafizə olunub, təhlükəsizlik tədbirləri çərçivəsində sakinlərin təxliyəsi həyata keçirilib.

Bakıda yaşayış binasındakı yanğın söndürülüb - YENİLƏNİB + FOTO/VİDEO

09:47

Paytaxtın Yeni Yasamal yaşayış massivində, Əsəd Əhmədov küçəsində yerləşən çoxmərtəbəli binada başlayan yanğınla əlaqədar polis əməkdaşları xidmətə çıxarılıblar.

Bu barədə Oxu.Az-a Daxili İşlər Nazirliyinin Mətbuat Xidmətindən bildirilib.

Qeyd olunub ki, ərazidə polis əməkdaşları tərəfindən təhlükəsizlik tədbirləri görülür.

09:14

Bakıda çoxmərtəbəli yaşayış binasında yanğın başlayıb.

“Report” xəbər verir ki, hadisə paytaxtın Yasamal rayonu, “Yeni Yasamal” massivi, Əsəd Əhmədov küçəsində yerləşən binada qeydə alınıb.

Yanğın çoxmərtəbəli binanın zirzəmisindən başlayıb və yuxarı mərtəbələrə keçib.

Hadisə yerinə yanğınsöndürənlər gəliblər.

Könül Cəfərli