17 yaşlı Röyalın anası: "Günlərdir dönər istəyir, onu belə ala bilmirəm"

17 yaşlı Röyalın dəstəyə ehtiyacı var.

Bu barədə Oxu.Az-a onun anası Gülbahar Əsgərova məlumat verib.

O bildirib ki, övladı beta-talassemiya və pnevmoniya xəstəliyindən əziyyət çəkir.

"Röyal üç il əvvəl vərəmli meningit keçirib, elə üç ildir görmə qabiliyyətini tamamilə itirib. Bundan əlavə, o, beta-talassemiya xəstəsidir. Ayda iki dəfə qan köçürülür, müxtəlif ağır dərmanlar qəbul edir. Dünən Röyalın halı pisləşdiyi üçün təcili tibbi yardım çağırdıq. Həkim Röyalın ürəyində problem olduğunu və həkimə aparmalı olduğumuzu dedi. Bu gün ona görə Röyalı təkrar həkim müayinəsinə aparacağıq".

Gülbahar Əsgərova Röyalın onun yeganə övladı olduğunu qeyd edib:

"Röyal mənim tək övladımdır. İkinci dəfə ana olmaq şansım yoxdur, çünki özüm də ağır əməliyyat keçirmişəm. Atası ağır xəstədir, anam isə yataq xəstəsidir. Təkcə Röyalın pensiyası ilə dolanmağa çalışırıq. Röyal mənim yeganə ümid yerimdir, ondan başqa heç kimim yoxdur. Ona nəsə olsa, "ana" kəlməsinə həsrət qalaram. O qədər həyat dolu uşaq idi ki, indi ağrılarına görə balamın üzü belə gülmür. İnanın, vəziyyətimiz o qədər ağırdır ki, Röyal günlərdir dönər istəyir, onu belə ala bilmirəm. Röyalın müalicəsi üçün 1000 manata ehtiyacımız var. Yardımsevər insanlardan bizə dəstək olmağı, övladımı bu çətin vəziyyətdən qurtarmaq üçün kömək olmağı xahiş edirəm".

Ailə ilə əlaqə: (055) 486-20-09.

"Kapital Bank": 4169 7385 3638 0284.

17 yaşlı Röyalın anası: "Günlərdir dönər istəyir, onu belə ala bilmirəm"