23 nömrəli məktəbdəki dəhşətli hadisənin təfərrüatı: “Müəlliməsini bıçaqlamaq istəyib” - YENİLƏNİB + VİDEO

Nəsimi rayonu, 23 nömrəli tam orta məktəbdə bıçaqlanma hadisəsi baş verib.

Belə ki, məktəbin yeddinci sinif şagirdləri arasında mübahisə yaranıb. Nəticədə 13 yaşlı məktəbli qız sinif yoldaşlarından birini bıçaqlayıb.

Baku TV-nin əməkdaşı sözügedən təhsil müəssisəsində olub, məsələni araşdırmağa çalışıb.

“Qız müəlliməsini bıçaqlamaq istəyib. Bıçağı çıxarıb, oğlan onu arxadan tutmaq istəyəndə boğazından xəsarət alıb”, - məktəbli deyib.

Hadisə ilə bağlı Daxili İşlər Nazirliyi (DİN) tərəfindən araşdırma aparılır.

23 nömrəli məktəbdəki dəhşətli hadisənin təfərrüatı: “Müəlliməsini bıçaqlamaq istəyib” - YENİLƏNİB + VİDEO

10:32

“Aprelin 1-də Bakıda 23 nömrəli tam orta məktəbdə tənəffüs zamanı şagirdlər arasında baş verən insident zamanı zərər çəkmiş yeniyetməyə ilkin tibbi-yardım göstərilib və evə buraxılıb. Hazırda şagirdin səhhətində hər hansı təhlükə riski yoxdur. Onun fiziki və psixoloji durumu məktəb rəhbərliyi və agentlik tərəfindən izlənilir”.

Bu barədə Məktəbəqədər və Ümumi Təhsil üzrə Dövlət Agentliyindən Oxu.Az-a verilən açıqlamada qeyd olunur.

Bildirilir ki, məktəb rəhbərliyi hadisəyə dərhal müdaxilə edib, məsələ ilə bağlı Nəsimi Rayon Polis İdarəsinə, digər müvafiq qurumlara, eyni zamanda, şagirdlərin valideynlərinə məlumat verilib və məktəbə çağırılıblar:

“Baş vermiş hadisə agentliyin nəzarətində saxlanılır. Agentliyin, eyni zamanda, Uşaqların Müdafiəsi İdarəsinin əməkdaşları da məktəbdə olublar. Qeyd olunanlarla yanaşı, stresin idarə olunması, sağlam psixoloji mühitin bərpasını təmin etmək üçün Təlimə Dəstək Mərkəzinin və “Məktəblinin dostu”nun psixoloqları da təhsil müəssisəsindədirlər. Şagirdlərlə bu istiqamətdə müvafiq intensiv iş aparılır”.

Vurğulanıb ki, agentlik, məktəb rəhbərliyi və hüquq-mühafizə orqanları tərəfindən mövcud qaydalar çərçivəsində lazımi tədbirlər görülür, məsələ ilə bağlı araşdırma aparılır:

“Araşdırmanın nəticələri ilə bağlı aidiyyəti qurumlar tərəfindən ictimaiyyətə məlumat veriləcək. Uşaqların yeniyetməlik dövrü olduğunu, araşdırma prosesinin davam etdiyini nəzərə alaraq ictimaiyyətdən də bu mövzuda daha həssas davranmalarını, paylaşımlarda rəsmi qurumların açıqlamalarına istinad etməyi xahiş edirik.

Könül Cəfərli