"Bakıda və başqa regionlarda qəzalı binalarla bağlı əhalinin müraciətləri əsasında əvvəlki dövrlərdə həmin binaların müayinəsi aparılıb və Fövqəladə Hallar Nazirliyinin müvafiq rəyi ilə bir neçə yüz ünvan müəyyənləşdirilib. Bununla bağlı Nazirlər Kabinetinin bizim komitəyə tapşırığı var".
Oxu.Az xəbər verir ki, bu sözləri jurnalistlərə açıqlamasında Dövlət Şəhərsalma və Arxitektura Komitəsinin sədri Anar Quliyev deyib.
O bildirib ki, hazırda iki yüzdən çox belə ünvan, yeddi mindən çox mənzil təhlil olunur:
"Son dövrdə onların təxminən yarısının vəziyyətinin təhlili başa çatdırılıb və bir neçəsi ilə bağlı işlər təşkil olunub. İşlər dedikdə burada həm özəl sahibkarların, tikinti şirkətlərinin investor qismində cəlb olunması, həm də dövlət vəsaiti hesabına qəza şəraitinin aradan qaldırılması nəzərdə tutulur. Hazırda təxminən 1 000 mənzillə bağlı iş aparılır, özəl qiymətləndiricilər dəvət olunublar. Bunlar tezliklə ardıcıl olaraq həll ediləcək. Artıq altı yüzdən çox mənzillə bağlı problem həll olunub. İşlər davam etdirilir".
Aygün Mirakif
