Son 5 ilin müşahidələri göstərir ki, Azərbaycan QHT-ləri artıq milli səviyyədən çıxaraq ölkənin hüdudlarını aşıblar. QHT-lərimiz beynəlxalq müstəvidə çoxsaylı təşəbbüslərin həyata keçirilməsinə müvəffəq olur. Azərbaycanın xarici siyasət kursuna dəstək olan həmin fəaliyyətlər ictimai diplomatiyanın bir parçası olaraq uğurlu şəkildə davam etdirilir.
Millət vəkili Azər Allahverənovun sözlərinə görə, Azərbaycan QHT-lərinin təşəbbüsü ilə Qlobal Cənub platforması yaranıb və bu platforma təqribən dünya əhalisinin 80 faizini əhatə edir:
"Qlobal Cənub qarşısında həm də Qlobal Şimal var və müxtəlif mövzular - iqlim dəyişikliyi, insan hüquqları, müstəmləkəçilik üzərindən Qlobal Cənubu bir növ təsir altında saxlamaqdadır. Məhz bu platforma üzərindən Azərbaycan Qlobal Cənubun səsinə çevrilib. Bundan başqa, Türk Dövlətləri Təşkilatına üzv ölkələrin QHT platformasının Azərbaycanda təsis olunması olduqca tarixi hadisədir. Hər iki qurumun, platformanın daimi katibliyi məhz Azərbaycanda fəaliyyət göstərəcək ki, bu da sevindirici bir haldır".
