Yeni istiqamətlər, yeni təkliflər - "UniDestin" nə vəd edir?
Azərbaycanda xaricdə təhsil, özünüinkişaf, karyera yüksəlişi sahəsində yeni istiqamətləri, innovativ təklifləri və uzunmüddətli dayanıqlılığı özündə ehtiva edən "UniDestin" Tədris Mərkəzinin açılışı olub.
Oxu.Az APA-ya istinadla xəbər verir ki, açılış mərasimində təhsil üzrə mütəxəssislərlə yanaşı, müxtəlif universitetlərin tələbələri, əməkdaşları və media nümayəndələri iştirak ediblər.
Ülviyyə Hüseynova: "UniDestin" Tədris Mərkəzi olaraq böyük konsepsiyanı əhatə etməyi və çoxşaxəli fəaliyyət göstərməyi hədəfləmişik"
"UniDestin" Tədris Mərkəzinin meneceri Ülviyyə Hüseynova APA-ya açıqlamasında yeni fəaliyyətə başlayan tədris mərkəzinin qısa müddətdə əldə etdiyi uğurlardan və qarşıya qoyulan məqsədlərdən bəhs edib:
"Son illər xaricdə təhsil almaq əksər tələbələrin arzusu, bir çoxunun isə tam qətiləşdirdiyi məqsədidir. Hamımıza məlumdur ki, kəmiyyət göstəricilərinə nəzər salsaq, görərik ki, bu gün Azərbaycanda onlarla xaricdə təhsillə bağlı kurs fəaliyyət göstərir. Keyfiyyət göstəricilərinə gəldikdə isə həmişə arzuolunan mənzərə ilə qarşılaşmırıq. "UniDestin" Tədris Mərkəzi olaraq böyük konsepsiyanı əhatə etmək və çoxşaxəli fəaliyyət göstərməyi hədəfləmişik".
Xaricdə təhsil almaq istəyən şəxs gedəcəyi ölkənin dövlət dilini öyrənmək şansı qazanacaq
Ülviyyə Hüseynova qeyd edib ki, "UniDestin"də dil kursları fəaliyyətə başlayır:
"Peşəkar dil mütəxəssislərinin iştirakı ilə dil kurslarımız fəaliyyətə başlayır. Bizə müraciət edən şəxs təhsil alacağı ölkənin dilini öyrənmək imkanı qazanacaq. Bundan əlavə, həmin ölkələrin dili ilə yanaşı, gündəlik həyatı, ab-havası, coğrafi mövqeyi, nəqliyyat sistemi və s. kimi detallarla bağlı tam məlumata sahib ola biləcəklər".
"UniDestin"in üçbucaqlı uğur strategiyası: fərdin karyera yüksəlişi - valideyn əminliyi - peşəkar müəllimlərlə iş
"Şagirdlərlə, tələbələrlə yanaşı, onların valideynləri ilə əlaqəli şəkildə irəliləməyin vacibliyi prinsiplərimizə daxildir. Ən azı, onlar öz övladlarının gələcəyini bizə etibar edərkən hər şeydən əmin olmalıdırlar. Üçbucaqlı uğur strategiyamızın tamamlayıcı tərəfi isə peşəkar müəllimlərlə işləməkdir. Bir az əvvəl qeyd etdiyim kimi, keyfiyyət göstəriciləri ilkin prinsipimizdir", - Ülviyyə Hüseynova əlavə edib.
"UniDestin" Tədris Mərkəzi tam xidmət modeli təklif edir - Karyeranın bütün mərhələlərini əhatə edən imkanlar
"UniDestin"in meneceri vurğulayıb ki, əsas fokuslandıqları məsələ tam xidmət modeli ilə bağlıdır:
"Dil kursları həmin tam xidmət modelinin ilkin mərhələsidir. Bu mərhələdən sonra xaricdəki univesitetlərdə mövcud olan müxtəlif ixtisaslar üzrə xüsusi təlimlər keçiriləcək. Məsələn, xaricdə fizika, kimya, tətbiqi riyaziyyat, informatika, yaxud digər hər hansı bir ixtisası seçmək istəyən şəxs üçün "UniDestin"də təşkil ediləcək təlimlər xaricidilli mütəxəssislər tərəfindən icra olunacaq. Onlar hər biri nüfuzlu universitetlərin məzunlarıdır".
Bürokratik əngəlləri dəf etmək üçün tələbələrə köməklik
Ülviyyə Hüseynova bildirib ki, azərbaycanlı tələbələrin xarici ölkələrdə təhsil alması üçün konsultasiya və sənədləşmə prosesi isə tam xidmət modelinin növbəti mərhələsini təşkil edir:
"Bəzən xarici universitetə qeydiyyat, sənədləşmə məsələlərində tələbələr çoxmərhələli proseslə üz-üzə olurlar. "UniDestin" bu məsələlərdə də tələbələrə dəstəyini əsirgəməyəcək. Xaricdə təhsil almaq üçün lazım olan sertifikatların təmin edilməsi də nəzərdə tutulub. Ən vacib məsələ isə xüsusi təqaüdlü proqramların qazanılmasıdır. Bu, xaricdə təhsil alan tələbənin sosial rifahı naminə prioritetlər sırasındadır".
Təhsildən sonrakı mərhələdə staj proqramları, müxtəlif təcrübələr
Həmsöhbətimiz tam xidmət modelinin təhsildən sonrakı mərhələni də əhatə etdiyi bildirib. O vurğulayıb ki, bu mərhələ karyera yüksəlişinin əsasını təşkil edir, ona görə də "UniDestin" gördüyü işin sona qədər uğuruna əmin olmaq üçün protəhsil dövründəki təcrübə məsələsində də şəxslərə yardımçı olacaq.
"UniDestin"in son iki uğuru - ABŞ universitetlərinə qəbul
Ülviyyə Hüseynova açılış mərasimində Amerika Birləşmiş Ştatlarının Nyu-York ştatında yerləşən Klarkson Universitetinə qəbul olan Asim Şirinovu və Massaçusets ştatında yerləşən UMass Boston kollecinə qəbul olan Günel Xəlilzadəni təbrik edib, tədris mərkəzinin son iki uğuru kimi onları nümunə göstərib. Onların hər ikisi APA-ya açıqlamasında universitetlərlə əlaqə saxlanılması, zəruri sənədlərin hazırlanması, ümumən, qəbul prosesində "UniDestin"in rolundan bəhs ediblər.
"UniDestin"də yaş məhdudiyyəti yoxdur
Mərkəzin meneceri açılışdakı nitqində fəaliyyət göstərəcək kurslardan yararlanmaq istəyənlər üçün yaş məhdudiyyətinin olmadığını vurğulayıb. O bildirib ki, həm ibtidai, həm orta, həm də ali təhsil alanların üzünə "UniDestin"in qapıları açıqdır.
"UniDestin" Xəzər Universitetindəki Karyera sərgisində iştirak edəcək
"UniDestin" Tədris Mərkəzi sabah Xəzər Universitetində keçiriləcək Karyera sərgisində iştirak edəcək", - Ülviyyə Hüseynova əlavə edib.
Avropa ilə yanaşı, Asiyadakı universitetlərə qəbul imkanı
"UniDestin" Tədris Mərkəzinin xaricdə təhsil üzrə mütəxəssisi Orxan Cəfərzadə çıxışında qeyd edib ki, Avropadakı universitetlərlə yanaşı, Asiyadakı ali təhsil ocaqlarına qəbul proqramlarını əldə etmək planlaşdırılır:
"UniDestin" xarici təhsillə yanaşı, tələbələrin "SAT", "TOEFL", "IELTS" imtahanlarından uğurla keçməsini və müvafiq sertifikatların onlara təqdim olunmasını da öhdəlik götürüb. Şirkətimiz dünyanın müxtəlif ölkələrində həm bakalavr, həm magistr, həm də doktorantura təhsil səviyyələri üzrə qəbullar həyata keçirir".
