Azərbaycanda teleradio yayımçılarının proqramlarının (verilişlərinin) ədəbi dil normalarına riayət edilməsi sahəsində may-iyun aylarında aparılmış monitorinqlərinin nəticələrinə əsasən ədəbi dilin qaydalarının daha çox hansı kanallarda pozulduğu məlum olub.
Oxu.Az APA-ya istinadən xəbər verir ki, Milli Televiziya və Radio Şurasının (MTRŞ) sədri Nuşirəvan Məhərrəmli aparılan monitorinqlər nəticəsində hazırda ədəbi dilin qaydalarının pozulması hallarının ən çox ANS telekanalında müşahidə olunması aşkarlandığını bildirib.
N.Məhərrəmli qeyd edib ki, Azərbaycanın digər televiziya və radio kanallarında da Azərbaycan ədəbi dili ilə bağlı nöqsanlar çoxdur və bu nöqsanların aradan qaldırılması üçün müvafiq işlər görülməlidir.
MTRŞ sədri həmçinin qeyd edib ki, bəzən qloballaşma şəraitində beynəlxalq dillərdən istifadə öz ana dilimizə laqeydliklə müşahidə olunur:
“Bəzi insanlar yeri gəldi-gəlmədi xarici sözlərdən tez-tez istifadə edirlər. Hətta daxili danışığımıza da bunu gətirirlər. Məsələn “Like” etmək sözü indiki cavanların ən çox sevdiyi sözlərdən biridir. Zaman keçdikcə “like” etmək sözü bizim də danışığımıza daxil olacaq. Bu, artıq ifrata varmaqdır. Buna görə də Azərbaycan ədəbi dilinin bu cür sözlərlə çirklənməsinin qarşısını almalıyıq”.
