Azərbaycanda "Erasmus+" proqramının dayandırılması məsələsinə AYDINLIQ GƏTİRİLDİ

Azərbaycanda "Erasmus+" proqramının dayandırılması sosial şəbəkədə müzakirə mövzusu olub.

Oxu.Az xəbər verir ki, "Azərbaycan Milli Erasmus+" ofisinin rəhbəri Pərviz Bağırov məsələyə aydınlıq gətirib.

P.Bağırov qeyd edib ki, hazırda "Erasmus+" proqramı çərçivəsində bütün fəaliyyətlər faktiki olaraq, qeyri-rəsmi şəkildə, dayandırılıb:

"Bu o deməkdir ki, yüzlərlə ICM (Beynəlxalq Kredit Mobilliyi - red.) tələbə və müəllim mübadilələri, CBHE (Ali təhsildə potensialın gücləndirilməsi) layihələri, Jan Monne təşəbbüsləri və digər "Erasmus+" layihələri ilə bağlı heç bir irəliləyiş yoxdur. Yəni yeni layihələr qeydiyyata alınmır və aktiv olanların da icrası dayandırılır.

Bundan əlavə, yaranmış vəziyyətlə əlaqədar "Milli Erasmus+" ofisi də bağlanmaq üzrədir. Bu isə proqramın gələcək icrasına ciddi təsir göstərə və ölkəmizdə "Erasmus+" layihələrinin davamlılığına mane ola bilər".

Ofisi rəhbəri onu da diqqətə çatdırıb ki, ümumi layihələrin büdcəsi 20 milyon manata yaxındır və layihələrdə Azərbaycanın 32 fərqli ali təhsil müəssisəsi iştirak edir.

P.Bağırov onu da vurğulayıb ki, mövcud məhdudiyyətlər "Erasmus Mundus Joint Master Degree" (EMJMD) proqramına şamil olunmur:

"Bu proqramın strukturu fərqlidir, fərdi namizədlər üçün nəzərdə tutulub və bakalavr məzunları birbaşa müraciət edərək təqaüdü müstəqil qaydada qazana bilərlər. Yəni "Erasmus Mundus" çərçivəsində Avropada magistr təhsili almaq istəyən namizədlər üçün heç bir dəyişiklik yoxdur və onlar əvvəlki qaydada müraciət edə bilərlər."

Qeyd edək ki, Açılışı "European Region Action Scheme for the Mobility of University Students" olan tələbə mübadilə proqramı "Erasmus" 1987-ci ildə yaradılıb.

Avropa Birliyi tərəfindən yaradılmış və universitetlər arasında əməkdaşlıq çərçivəsində maliyyələşdirilən proqram bakalavr və təhsilinin növbəti pillələrini davam etdirmək istəyən tələbələr, xaricdə yaşamaq istəyən şəxslər və karyeralarında yüksəlmək üçün müxtəlif təcrübə proqramlarda iştirak etmək istəyən gəncləri özündə birləşdirən sistemdir.

Əzizə İsmayılova