Azərbaycanda ümumi nəsilvermə əmsalında uzunmüddətli azalma müşahidə olunur.
Oxu.Az xəbər verir ki, bu barədə Dövlət Statistika Komitəsi məlumat yayıb.
Təqdim olunan qrafikə əsasən, 1975-ci ildə ölkədə ümumi nəsilvermə əmsalı 3.74 olduğu halda, 1980-ci ildə 3.25-ə, 1990-cı ildə 2.8-ə, 2000-ci ildə isə 1.9-a enib.
2005-ci ildə göstərici 2.3-ə yüksəlsə də, sonrakı illərdə yenidən azalma qeydə alınıb. 2011-ci ildə 2.4 olan əmsal 2017-ci ildə 1.9-a, 2021-ci ildə 1.5-ə düşüb.
Qrafikdə əks olunan məlumata görə, 2022-ci ildə göstərici müvəqqəti olaraq 1.7-yə yüksəlib. Lakin sonrakı illərdə azalma davam edib və 2024-ci və 2025-ci illərdə 1.4 səviyyəsində qeydə alınıb.
Ümumi nəsilvermə əmsalı bir qadına onun reproduktiv dövrü ərzində düşən orta uşaq sayını ifadə edir. Beləliklə, təqdim olunan göstəricilər Azərbaycanda nəsilvermə səviyyəsinin son onilliklərdə əhəmiyyətli dərəcədə azaldığını göstərir.
