Bu gün Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Bakı Reabilitasiya Mərkəzinə mediatur təşkil edilib.
Oxu.Az xəbər verir ki, media nümayəndələri Mərkəzdə yaradılan şəraitlə, göstərilən xidmətlərlə və burada tətbiq olunan fizioterapevtik prosedurlarla yaxından tanış olublar.
Bakı Reabilitasiya Mərkəzinin direktoru Vüsalə Kazımova jurnalistlərə açıqlamasında qeyd edib ki, müəssisədə 60 çarpayı mövcuddur və il ərzində 1 500 nəfərə stasionar, 800 nəfərə isə ambulator qaydada xidmət göstərilib. Həmçinin onlayn və səyyar xidmətlər də mövcuddur.
Qeyd edək ki, mərkəz əlilliyi olan şəxslər və onların ailə üzvlərinə xidmət göstərir. Burada sakinlər stasionar, ambulator, icma əsaslı, səyyar xidmətlərə, eləcə də hippoterapiya və sosial-psixoloji dəstək tədbirlərinə cəlb edilirlər.
Stasionar qaydada reabilitasiya kursu keçmələri üçün əlilliyi olan şəxslər qeydiyyatda olduqları ərazi üzrə Tibbi-sosial ekspert komissiyaları və ya DOST Mərkəzlərinə, ambulator və digər qaydada reabilitasiya xidmətlərindən yararlanmaq üçün isə birbaşa reabilitasiya müəssisələrinə müraciət edə bilərlər.
Hazırda mərkəzdə 200-ə yaxın şəxsə müxtəlif xidmətlər göstərilir.
