"Ermənistanda parlament seçkisinin ardınca elə bir vəziyyət yaranıb ki, Nikol Paşinyan hakimiyyətdə olsa da, Azərbaycanla sülh danışıqlarında öz strategiyasını tətbiq etmək üçün kifayət qədər təsir vasitələrinə malik deyil".
Oxu.Az Ermənistan mətbuatına istinadən xəbər verir ki, bunu siyasi şərhçi Akop Badalyan deyib.
Oktyabrın 22-də keçirilən brifinq zamanı Paşinyan konstitusiya çoxluğunu əldə etmək (son seçkidə onun partiyası 49,81% səs toplayıb) və yeni konstitusiyanın qəbuluna nail olmaq məqsədilə növbədənkənar parlament seçkisinin keçirilməsi ehtimalını istisna etməyib. Baş nazir bildirib ki, "biz müxalifətdən olan həmkarlarımızı bunun çox mühüm və prinsipial məsələ olduğuna inandırmağa çalışacağıq". O əlavə edib ki, əgər bu alınmasa, Ermənistanın hakim qüvvəsi digər ssenarilərə, o cümlədən növbədənkənar seçkiyə müraciət edəcək.
Akop Badalyan qeyd edib ki, baş nazir öz hakimiyyətini məhz sülh prosesi üzərində qurub:
"Prosesin ləngiməsi Paşinyanın hakimiyyət mövqelərini zəiflədir və belə bir şəraitdə növbədənkənar seçki variantı mövcud iqtidar üçün müəyyən ümid mənbəyinə çevrilir. Təbii ki, bu seçki vasitəsilə Paşinyanın özünə konstitusiya çoxluğunu təmin edə biləcəyinə yüz faizlik zəmanət yoxdur. Lakin o, şübhəsiz ki, buna can atacaq və müxalifətə maksimum dərəcədə ağır zərbə vurmaq üçün yenidən hakimiyyət rıçaqlarından istifadə etməyə cəhd göstərəcək".
Eyni zamanda, Paşinyan növbədənkənar seçki ilə bağlı bəyanatla həm Ermənistan daxilində, həm də ondan kənarda olan əhval-ruhiyyəni yoxlayır. Çünki istər Ermənistanda, istərsə də Azərbaycanda və Ermənistan-Azərbaycan prosesində öz maraqlarını güdən geosiyasi mərkəzlərdə yaxşı başa düşürlər ki, Ermənistanın hazırkı iqtidarı Bakının bu ilkin şərtini yerinə yetirmək üçün konstitusiya imkanlarına malik deyil.
Ekspert istisna etmir ki, iqtidar konstitusiya çoxluğunu təmin etmək üçün çatışmayan altı səsi toplamaq məqsədilə müxalifət nümayəndələrinə təzyiq göstərərək onları öz tərəfinə çəkməyə cəhd edəcək. Mövcud vəziyyət göstərir ki, Ermənistan hansısa yolla Azərbaycanın şərtini təmin etməlidir. Amma müxalifətin səsləri olmadan bu qeyri-mümkündür.
Qeyd edək ki, jurnalistlərlə keçirilən brifinqdə Paşinyan Azərbaycanla sülh müqaviləsinin 2027-2028-ci illərdə imzalanmalı olduğu fikrini də səsləndirib. Baxmayaraq ki, parlament seçkisinə qədər ehtimal olunan müddət kimi əvvəlcə 2026-cı ilin sonu, daha sonra isə 2031-ci il göstərilirdi.
