Bakıda bayram namazı qılınıb

Azərbaycanda mart ayının 30-da Ramazan ayının başa çatması ilə əlaqədar məscidlərdə bayram namazı qılınıb.

İlk bayram namazı səhər saat 8-də Əjdərbəy məscidində, daha sonra saat 9-da Təzəpir məscidində qılınıb.

Şəhər sakinləri və ölkəmizdə olan müsəlman əcnəbilər də bayram namazında iştirak edərək bayram sevinclərini bölüşüblər.

"Ailəm üçün dualar etdim. Ölkəmə, xalqıma əmin-amanlıq arzuladım", - deyə sakin söyləyib.

"İş adamıyam, Azərbaycanda yaşayıram. Namaz qıldıq. Hər şey çox yaxşı idi", - pakistanlı müsəlman deyib.

Daha ətraflı Baku TV-nin videomaterialında:

Bakıda bayram namazı qılınıb

11:00

Bakıda Ramazan Bayramı münasibətilə Təzəpir məscidində bayram namazı qılınıb.

Oxu.Az xəbər verir ki, bayram namazı saat 09:00-da başlayıb.

Daha çox foto burada: PhotoStock.az

09:20

Bakıda Ramazan Bayramı münasibətilə bayram namazı qılınıb.

Oxu.Az xəbər verir ki, Əjdərbəy məscidində bayram namazı saat 08:00-da başlayıb.

Xatırladaq ki, bu gün və sabah Azərbaycanda Ramazan bayramı qeyd olunur.

Ramazan ayı insanlara Allahı sevməyi öyrədir, onlara öz iradəsini, dözümünü yoxlamaq imkanı verir, insanları gözüaçıq, vicdanlı olmağa yönəldir və bunlar orucla ifadə olunur.

Məhz Ramazan ayının son 10 gecəsinin birində Quran nazil olmağa başlayıb. Qədr gecəsi "leylətul-qədr" - qüdrətli, əzəmətli gecə adlanır. Quranda bu gecə haqqında belə yazılır: "Biz bu gecə, həqiqətən, qüdrət, əzəmət hədiyyə etmişik; bu gecə 1000 aydan da qüdrətlidir. Mələklər aşağı enərək Allahın əmrini gözləyirlər, bu gecə şəfəq doğanadək əmin-amanlıq, sülh olacaq" (97:1-5).

Azərbaycanda Ramazan bayramı 1993-cü ildən dövlət səviyyəsində qeyd olunur.

Qeyd edək ki, bu il Azərbaycanda Ramazan ayı martın 1-dən başlayıb.