Bakıda İspaniyanın nüfuzlu ali təhsil müəssisələrindən biri olan IE Universitetinin Liderlik və İnnovasiya Mərkəzinin (IE Hub for Leadership and Innovation) açılışı keçirilib.
Oxu.Az xəbər verir ki, "PAŞA Holding" və SOCAR-la strateji tərəfdaşlıq çərçivəsində yaradılan mərkəz Elm və Təhsil Nazirliyinin və İqtisadiyyat Nazirliyinin institusional dəstəyi ilə fəaliyyət göstərəcək.
ADA Universitetində yerləşən mərkəzin əsas məqsədi korporativ əməkdaşlığı genişləndirmək, insan kapitalının inkişafını dəstəkləmək, yeni bilik və ideyaların tətbiqini təşviq etmək, eləcə də sahibkarlıq və innovasiya ekosisteminin inkişafına töhfə verməkdir. Mərkəz ilk növbədə Azərbaycana yönəlmiş fəaliyyətini gələcəkdə Mərkəzi Asiya regionunda əməkdaşlıq imkanlarının genişləndirilməsi ilə tamamlayacaq.
Mərkəzin fəaliyyəti üç əsas istiqaməti əhatə edir:
- Təhsil və inkişaf;
- Tədqiqat və innovasiya;
- Yeni bizneslərin yaradılması.
Mərkəzin açılış mərasimində iştirak edən "PAŞA Holding"in baş icraçı direktoru Cəlal Qasımov insan kapitalının inkişafı, bilik və təcrübə mübadiləsi, eləcə də innovativ düşüncə tərzinin təşviqinin uzunmüddətli iqtisadi inkişaf və rəqabət qabiliyyəti baxımından əhəmiyyətini vurğulayıb.
"Bakıda IE Habın yaradılması Azərbaycanın biznes mühitinin beynəlxalq təhsil və innovasiya ekosistemi ilə inteqrasiyasını gücləndirmək, yerli istedadların potensialını inkişaf etdirmək və yeni əməkdaşlıq imkanları yaratmaq baxımından mühüm əhəmiyyət daşıyır. "PAŞA Holding" olaraq, özəl sektor, akademik mühit və beynəlxalq tərəfdaşlar arasında davamlı əməkdaşlığın ölkəmizin inkişafına real töhfə verəcəyinə inanırıq", - deyə Cəlal Qasımov qeyd edib.
İqtisadiyyat nazirinin müavini Səməd Bəşirli beynəlxalq bilik və təcrübənin ölkəmizə cəlbinə, təhsil və biznes arasında əlaqələrin möhkəmləndirilməsinə, yeni ideyaların biznes təşəbbüslərinə çevrilməsinə xidmət edən tərəfdaşlığın əhəmiyyətini vurğulayıb. Qeyd edilib ki, əməkdaşlıq çərçivəsində beynəlxalq təcrübənin öyrənilməsi, iqtisadi inkişafın prioritetləri üzrə bilik mübadiləsinin genişləndirilməsi və tədqiqat nəticələrinin praktik tətbiqinin dəstəklənməsi hədəflənir.
Mərkəzin açılışının mühüm hadisə olduğunu söyləyən SOCAR-ın vitse-prezidenti bildirib ki, IE Hab sadəcə yeni bir məkanın yaradılması və ya yeni proqramın həyata keçirilməsi deyil. Burada əsas diqqət insanlara yönəlib.
"Binalar inşa etmək, texnologiyalar əldə etmək mümkündür. Lakin bütün bunların işləməsini təmin edən, ideyaları reallığa çevirən, başqalarını ruhlandıran və çətinlikləri yeni imkanlara çevirən məhz insanlardır. Dayanıqlı inkişafın təməli də elə burada qoyulur. Bugünkü tədbirə xüsusi əhəmiyyət qazandıran da məhz budur", - deyə vitse-prezident vurğulayıb.
Nəzrin Mirzəyeva
