Bakıda "MBFW Azerbaijan" beynəlxalq moda həftəsinin ilk mövsümü başa çatdı

Bakıda baş tutan "MBFW Azerbaijan" beynəlxalq moda həftəsinin ilk mövsümü dəb, incəsənət və müasir texnologiyaları bir araya gətirən parlaq və zəngin tədbirlə başa çatıb.

Oxu.Az xəbər verir ki, tədbirin təşkilatçıları Azərbaycan Moda Dizaynerləri Assosiasiyası və "Led.az Events" olublar. Tədbirə strateji tərəfdaş olaraq "Mercedes-Benz" və "Mercedes-Benz" markasının Azərbaycandakı rəsmi distribyutoru "Avtokapital-Azərbaycan" MMC dəstək göstərib.

Moda nümayişləri Abşeron Avtomobil Mərkəzində keçirilib. Bu müasir şourum #MAR20x standartına cavab verir və "Mercedes-Benz" brendinin yeni konseptual yanaşmasının təcəssümüdür. Bu unikal format iştirakçılara və qonaqlara təkcə dəb kolleksiyaları və incəsənət instalyasiyaları ilə tanış olmaq deyil, həm də "Mercedes-Benz" brendinin innovativ ruhunu mədəni hadisənin mərkəzində hiss etmək imkanı verib.

Tədbir 15-17 may tarixlərində baş tutub və beynəlxalq dizaynerlərin moda nümayişlərini, incəsənət instalyasiyalarını, təqdimatları və yaradıcılıq sənayesinin aktual tendensiyalarını əks etdirən sərgiləri əhatə edib. Hər gün müəyyən bir bədii mövzuya həsr olunmuşdu: renessans, pop-art və ekspressionizm. "S Design" agentliyi tərəfindən hazırlanmış dekorlar və süni intellektin yaratdığı vizual proyeksiyalar hər mövzuya uyğun immersiv atmosfer yaradırdı.

Həftənin ilk günü Azərbaycan Dövlət Opera və Balet Teatrının solisti, istedadlı tenor Atəş Qarayevin çıxışı ilə açıldı və tədbirə xüsusi ton verdi.

İkinci gün isə "Avroviziya-2024" musiqi müsabiqəsində Azərbaycanı təmsil etmiş müğənni və bəstəkar Fahree-nin çıxışı ilə yadda qaldı, bu da tədbirə parlaq bayram ab-havası qatdı.

Tədbir çərçivəsində aşağıdakı dizaynerlərin kolleksiyaları təqdim olundu: Ziya Koçaturk (Türkiyə), T.Yefremova & Irra (Belarus), Emilio Bonadio (İtaliya), Blikvanger & Idividi (Gürcüstan), Vague (Gürcüstan, İsrail), Rox Nassenova (Qazaxıstan), Black Queen (Belarus), Papilio by Alena Goretskaya (Belarus).

Xüsusi məqam isə "Azerbaijan Fashion&Art" sərgisi oldu. Burada yerli brendlər öz kolleksiyalarını təqdim etdilər: "Muse Me", "The Tothu", "Parcha Studio", "Gaga Factory", "Dova 24", "Sultan Couture", "Natavan Aliyeva", "Sameera" və "Kaftan". Həmçinin müasir Azərbaycan rəssamı Elnarə Nəsirlinin incəsənət instalyasiyası nümayiş olundu.

Bundan əlavə, "Nino Sepo" və "Narmeen Jewelry" zinət əşyaları brendlərinin şourumları, eləcə də dizaynerlər Vira Plotnikova və "Co.Lab"ın kolleksiya işlərinin sərgiləri təşkil olundu. Türk zinət evi "Panghia"nın rahat şourumda təqdimatı və "Adidas for Mercedes-Benz" kolleksiyasının nümayişi tədbirin beynəlxalq statusunu və "Mercedes-Benz" brendinin mədəni dialoq və innovativ eksperimentlərə inteqrasiyasını ön plana çıxardı.

Hər günün sonunda DJ AKG tərəfindən təqdim olunan DJ setləri tədbirə bayram əhvali-ruhiyyəsi və dinamika əlavə edirdi.

Mövsümün tərəfdaşları arasında aparıcı şirkət və təşkilatlar yer alıb: Alman-Azərbaycan Ticarət Palatası, "MyBrands", MAC, "L'Oréal Professionnel", "KSpace", "Braun", "Absheron Hotel Group", "Turizm.az", "Museum Furniture & Accessories", "Johnnie Walker", "A11 Logistics", "Big Model Agency", "Notes Gastronomy & Bar", "Shur" və "Yacht Club Residence".

"MBFW Azerbaijan" yaradıcı ideyaların nümayişi, yerli və beynəlxalq istedadların dəstəklənməsi üçün mühüm platformaya çevrildi və sübut etdi ki, Azərbaycan müasir mədəni dialoq və innovativ eksperimentlərin mərkəzi ola bilər. Eyni zamanda, "Autocapital-Azerbaijan" şirkəti tərəfindən təmsil olunan "Mercedes-Benz" brendi ilə əməkdaşlığın əhəmiyyətini də vurğuladı.