Bakı dünya modasının yeni mərkəzinə çevrilir: "MBFW Azerbaijan"ın ilk mövsümü start götürdü

2025-ci il mayın 15-də Bakıda "Mercedes-Benz"in strateji tərəfdaşlığı ilə rəsmi beynəlxalq tədbir olacaq "Mercedes-Benz Fashion Week (MBFW) Azerbaijan"ın ilk mövsümünün açılışı olub.

Oxu.Az xəbər verir ki, Azərbaycan Moda Dizaynerləri Assosiasiyası və "Led.az Events"in təşkil etdiyi bu tədbir həm yerli, həm də beynəlxalq dizaynerlərin istedadlarını nümayiş etdirmək üçün ən parlaq platforma olacağını vəd edir.

"Bu, təkcə yerli moda sənayesi üçün deyil, bütövlükdə bütün ölkə üçün möhtəşəm hadisədir. Tədbir dünya şöhrətli "Mercedes-Benz" brendinin dəstəyi ilə keçirilir, bu da Azərbaycan modasının qlobal səviyyədə tanınmasına dəlalət edir. Bu, bütün dizaynerlər və bütövlükdə moda sənayesi üçün irəliyə doğru böyük addım olacaq.

"MBFW Azerbaijan" çərçivəsində doqquz xarici dizayner öz kolleksiyalarını təqdim edəcək. Onların iştirakı dünya modasının son tendensiyalarını nümayiş etdirməyə və yerli dizaynerlərlə təcrübə mübadiləsi aparmağa imkan verəcək. Biz podiumda nümayişlərdən əlavə, Azərbaycanın aparıcı modelyerlərinin brendlərinin DNT-sini əks etdirən sərgilər və kolleksiyaları ilə müvəqqəti "şou-rum" hazırlamışıq.

Məqsədimiz təkcə beynəlxalq dizaynerlərə diqqət çəkmək deyil, həm də istedadlı azərbaycanlı modelyerləri hərtərəfli dəstəkləməkdir. "MBFW Azerbaijan" ölkəmizin bütün moda sənayesi üçün irəliyə doğru böyük addımdır", - deyə Azərbaycan Moda Dizaynerləri Assosiasiyasının təsisçisi və rəhbəri, "Mercedes-Benz Fashion Week Azerbaijan"ın həmtəşkilatçısı Aysel Hüseynova bildirib.

Mayın 17-dək davam edəcək "MBFW Azerbaijan" proqramı çərçivəsində İtaliya, Gürcüstan, Qazaxıstan, Türkiyə, Belarus və İsraildən olan ekspertlərin öz ideyalarını təqdim edəcəkləri təsirli şoular planlaşdırılıb.

Belarusun "Black Queen" brendi ilk dəfə moda dünyasının belə möhtəşəm tədbirində iştirak edib. Dizayner Olya Derevyaşko tədbirlə bağlı təəssüratlarını Oxu.Az-la bölüşüb və gənc Belarus brendi üçün orada iştirakın əhəmiyyətindən danışıb.

"Biz "Mercedes-Benz Fashion Week Azerbaijan"ın ən yüksək səviyyədə keçirilməsinə görə təşkilatçılara inanılmaz dərəcədə minnətdarıq. Bu, bir çox brendin arzuladığı genişmiqyaslı tədbirdir. Ciddi seçimdən keçmək və Minski təmsil etmək imkanı əldə etmək bizim üçün böyük şərəfdir. Zövqümüz və tərzimiz təcrübəli Bakı ictimaiyyətinin gözləntilərinə uyğun olduğundan çox məmnunuq. Ümid edirik ki, debüt kolleksiyamızla tamaşaçıları yaxşı mənada təəccübləndirəcəyik və Belarus modasını layiqincə təmsil edəcəyik", -deyə O.Derevyaşko qeyd edib.

Bununla belə, tədbirin əsas nüansı dizaynerlər tərəfindən ən son texnoloji həllərin - süni intellektin, virtual və artırılmış reallığın tətbiqi olacaq. Bu yeniliklər dünya modasında əvvəllər istifadə olunmayan konseptləri həyata keçirən unikal kolleksiyalar yaratmağa imkan verəcək. Tamaşaçıları moda sənayesinin gələcəyinə aparan cəlbedici təcrübə gözləyir.

"MBFW Azerbaijan" proqramında xüsusi yeri "Azerbaijan Fashion&Art" ekspozisiyası tutur. Bu ekspozisiya "Muse Me", "The Tothu", "Parcha Studio", "Gaga Factory", "Dova 24", "Sultan Couture", "Natavan Aliyeva", "Sameera", "Kaftan" brendlərinin və tanınmış rəssam Elnarə Nəsirli art-installyasiyasının təqdimatı vasitəsilə ölkəmizin dəb arenasına baxmağa imkan verəcək. Bu ekspozisiya çoxəsrlik ənənələri və müasir tendensiyaları harmonik şəkildə birləşdirən yerli moda və incəsənət səhnəsinin parlaq əksi olacaq.

"MBFW Azerbaijan"ın ilk mövsümünə dəstəyi Almaniya-Azərbaycan Ticarət Palatası (AHK), "MyBrands", MAC, "L'Oreal Professionnel", "Kspace", "Braun", "Absheron Hotel Group", Turizm.az, "S Design", "Museum Furniture&Accessories", "Johnnie Walker", "Big Gastronomy", "A11B & Logistics", "Big Model Agency", "Notes Gastronomy&Bar", "Shur", "Dadim", "Yacht Club Residence" və s. şirkət və təşkilatlar göstərir.

"Mercedes-Benz Fashion Week Azerbaijan"ın keçirilməsi dizaynerlər, brendlər və rəssamların beynəlxalq arenada tanınması üçün unikal imkandır. Tədbir təkcə Azərbaycanın deyil, bütün dünya moda tarixində yeni mərhələyə çevriləcək canlı və ruhlandırıcı hadisə yaratmaq üçün moda, incəsənət və qabaqcıl texnologiyanı bir araya gətirir. Təsadüfi deyil ki, "Elle Uzbekistan", "Tatler Kazakhstan", "Baku Magazine", "Caspian Magazine, "&Beyond Magazine", "Nargis Magazine", "The Diary", Media.az, Oxu.Az, "PhotoStock", "1News", Trend.az, Day.az, Milli.az, "25Trend", "Fiftysix Magazine" və "Brands Fashion Busines" kimi nüfuzlu nəşrlər "MBFW Azerbaijan"ın ilk mövsümünün rəsmi media tərəfdaşlarıdırlar.