Bakıda Vaqif prospektində yol nişanlanması sürücülərin narazılığına səbəb olub.
Oxu.Az xəbər verir ki, sürücülərdən biri bununla bağlı sosial şəbəkədə paylaşım edib.
O bildirib ki, prospektdəki bəzi zolaqlar və silinmiş yol xətləri çaşdırıcıdır.
Şəhərin bir çox küçəsində rast gəlinən bu cür müxtəlif yol nişanlanmalarının təyinatı barədə məlumatlı olmayan sürücülər də az deyil.
Bəs bu yol xətləri hansı məqsədlə çəkilir?
Məsələ ilə bağlı Oxu.Az-ın sorğusuna cavab olaraq Azərbaycan Yerüstü Nəqliyyat Agentliyindən (AYNA) verilən məlumatda bildirilib ki, sözügedən prospektdə xətlənmə işləri yolun buraxıcılıq qabiliyyəti saxlanılmaqla hərəkətin təhlükəsizliyini artırmaq məqsədilə həyata keçirilib:
"Zolaqların bu cür təşkili nəqliyyat axınını sakitləşdirməyə, sürücülərin kəsişmə və piyada keçidlərinə yaxınlaşarkən sürəti azaltmağa və daha diqqətli olmağa şərait yaradır. Belə yanaşma beynəlxalq praktikada geniş yayılıb və işıqfor quraşdırmadan nəqliyyat axınını sakitləşdirməyə yönəlib.
Zolaqların başlanğıcında və sonunda yarımdairə buferlər isə nəqliyyat vasitələrinin dayanma ərazisini müəyyən edir. Bu buferlər kəsişən küçələrə daxil olan və prospektə çıxan avtomobillərin təhlükəsiz manevr radiusunu qorumaq məqsədi daşıyır", - deyə qurumdan məlumat verilib.
Dövlət qurumu zolaqların tam silinməməsi ilə bağlı məsələyə aydınlıq gətirməyib.